Page 95 - MIN VOS

Ministernan ta haya recorido di edificio nobo di pashent na
Dr. Horacio Oduber Hospital cu ta algo impresionante

Wednesday, 19 April 2017 19:42
Comparti

Minister President Mike Eman a keda gratamente impresiona despues di a recore algun piso di e edificio
nobo pa pashent na Dr. Horacio Oduber Hospital. A haya oportunidad di mira e facilidadnan di
Emergencia y Kraamafdeling cu ta situa na e prome y di dos piso y cu durante e proximo cuater luna lo
cuminsa ricibi e prome pashentnan.

Prome Minister Eman ta hopi complace cu tur loke el a mira ya cu ademas di aumenta e capacidad pa
atende pashent, a tene cuenta cu hopi detaya cu ta eleva e servicio y experiencia pa e pashent, pero tambe
e ambiente di trabou pa e personal. Hunto cu Minister di Infrastructura Benny Sevinger, Eman a haya un
tour di colega di Salud Publico, dokter Alex Schengle ademas di representantenan di SOGA, AIB,
compania constructor y e propio gerencia di hospital, a conoce e espacio cu ta destina pa Eerste Hulp cu
pronto ta conta cu 17 camber, cual ta 10 mas di loke tin actualmente, ademas di un entrada exclusivo pa
pashent walk ins y otro separa pa ambulans. Den e di dos piso a mira cambernan di 1 of te 2 pashent, cual
ta bay duna hopi mas privacidad y control di sanidad den e camber. Tambe tin cambernan di parto hopi
espacioso y cu tur e conexionnan pa atende cualkier necesidad y te hasta duna opcion di duna luz riba
cama of bou di awa manera cu ta un practica normal den exterior. Compania constructor ta masha
orguyoso pa e calidad di construccion y ta califica e facilidad como un di esnan miho den henter area di
Caribe. En total, e edificio tin e capacidad di hospital cu 134 cama di pashent. Adicionamente, Minister
Schwengle a duna di conoce cu ta trahando riba e capacitacion di e personal como preparacion pa e
facilidadnan nobo, pero tambe tin planea pa haci un evaluacion inmediato pa delinea kico lo ta e
siguiente necesidadnan di dr. Horacio Oduber Hospital pa brinda e miho cuido di salud posibel.