Page 11 - MIN SJA 28 JAN 2017

Dia 19 di Januari ultimo Gobernador J.A. Boekhoudt a
hasi un bishita di cortesia na Rode Kruis Aruba

Friday, 27 January 2017 18:52
Comparti

E director M.Lahaye y miembronan presente di e directiva , president sr. E.Oduber, miembronan
sra. T.Waldron, sres. J.van Schaik, L.Oduber hunto cu e Staf y empleadonan y un cantidad di
boluntario y yama Gobernador Boekhoudt bon bini.

Pa Gobernador esaki ya tawata un tereno familiar, pasobra e mes tawata Presidente di Directiva di
aña 2010 pa 2013 na Rode Kruis. Gobernador a haya un recorido y bista di e edificio nobo di Rode
Kruis cu a ser inaugura pa Gobernador di e tempo ey F.J.Refunjol, y tambe el a bishita e Charity
Bazaar. Directiva y Comision y Staff a informa Gobernador tocante e desaroyonan di e ultimo 3
añanan y a papia di e plan y ambicionnan di Rode Kruis, cu lo celebra su 60 aña di existencia e aña
aki. E topiconan di combersacion tawata entre otro e cuido y centro di acomodacion di parti di Rode
Kruis pa cu e gruponan vulnerabel , entre nan, famianan cu entrada minimo, esnan di edad avansa y
algun casonan tambe di turistanan, e rol di Rode Kruis durante combatimento di Calamidad y e
transporte pa medio di Ambulans. Gobernador Boekhoudt a felicita Rode Kruis pa e esfuerzonan y
prestacion hasi durante añanan y e envolvimento di tur e boluntarionan.