Page 14 - MIN ECEM

Monumentenfonds reenforsando lasonan di trabou na
Hulanda

Directora di Stichting Monumentenfonds Aruba (SMFA), Anne Witsenburg, hunto cu e lider di
proyectonan, Joost Saris, di SMFA a haci un bishita di trabou na Hulanda den e luna di april. Akinan a
topa tambe cu coleganan di Monumentenfonds Curaçao y Stichting Monumentenzorg Curaçao y a traha
hunto pa crea contactonan nobo y reenforsa contactonan existente.

E bishita laboral a cuminsa cu un reunion na SUS Ateliers cu alumnonan cu a haci nan stage na SMFA
den pasado y ya a caba nan studio y tambe potencial futuro graduadonan cu lo kier haci nan
afstudeeropdracht na Aruba. Tambe a tene un charla motivacional cu alumnonan di Hogeschool
Rotterdam y TU Delft den compania di Minister Plenipotenciario Sr. Juan David Irausquin. Tambe a
haci un bishita na Arubahuis y ATA Europe caminda a papia entre otro tocante actividadnan di SMFA cu
ATA lo por yuda promove esaki tambe entre bishitantenan di Europa. Tambe contacto cu entre otro
medionan di comunicacion y escritornan cu ta bishita Aruba pa asina SMFA por dunanan un guia y
tambe informacion tocante Monumentonan di Aruba y desaroyonan riba e tema aki. Siguientemente a
sera conoci cu e director nobo di Nationaal Restauratie Fonds Aruba caminda a discuti tocante
acuerdonan, desaroyonan actual y futuro proyectonan di SMFA. Den pasado Restauratiefonds a duna
‘low interest loans’ cu SMFA a usa pa restora e Watertorenan, Lighthouse y Nicolaas Store. Tambe a
bishita e Erfgoed Event na den Bosch caminda por a haña y comparti ideanan cu diferente
organisacionnan y companianan cu ta traha den e area di herencia cultural. A haci uso tambe di e
oportunidad pa haci un entrevista cu e revista Herenhuis cual net na e momento ey tabata tin un
redacteur di bishita na Aruba cu lo scirbi tambe un articulo tocante entre otro Nicolaas Store y California
Lighthouse.

Hunto cu coleganan di Curaçao a bishita Rijksdienst Cultureel Erfgoed na Amersfoort caminda cu a bin
dilanti e tema di investigacion di metodonan pa e problematica di salo y vocht den e area di Aruba y
Curaçao pa asina por preserva e monumentonan na un manera mas efectivo. Otro encuentronan
interesante tabata cu Nationale Monumenten Organisatie y tambe Stichting Utrechtse
Monumentenfonds cual ta enfoca hopi riba uso di monumentonan den forma di vivienda social y por
ultimo tambe a combersa cu representantenan di Hermon BV cu ta un organisacion cu ta traha den un
forma similar na SMFA y tambe sin subsidio. SMFA tabata tin un bishita di trabou intensivo cu
resultadonan positivo pa futuro proyectonan y caminda tambe a resalta un biaha mas e importancia di
traha hunto cu partnersnan den Caribe y Hulanda pa asina hunto nos sigui preserva e pasado pa futuro.