Page 9 - AAA

Avianca ta amplia su vuelonan di y pa colombia cu 4 extra
vuelo pa siman

Thursday, 06 April 2017 21:10
Comparti

Den oranan di diahuebs atardi sra. Viviana Martin, Presidente y Gerente General di Avianca Costa Rica a
haci un bishita cerca Prome Minister Eman pa dun'e e bon noticia cu Avianca ta bay amplia su vuelonan
pa Aruba
, desde 17 di april cu 4 vuelo extra cu ta suma un total di 11 vuelo pa siman. Esaki ta nifica 480 stoel extra
pa siman.

Sra. Martin: "Semper cu nos reuni cu autoridadnan di Aruba un bes pa aña, ta pasa algo positivo. Awor
tin shete vuelo pa siman di Avianca pa Colombia y nos a wordo pidi pa aumenta e vuelonan aki mirando
cu na Aruba tin un comunidad grandi di Colombiano. Nos a haci un revision y awe nos por trece bon
noticia pa Aruba. Desde 17 di april nos ta bay aumenta e vuelonan cu 4 extra. E extra vuelonan aki ta bay
ta riba diabierna, diasabra, diadomingo y dialuna den oranan di mainta." Sra. Martin tabatin palabranan
di gran aprecio y gratitud pa Prome Minister Eman pa su aporte den esaki.
Prome Minister Eman a bisa di ta masha agradecido pa e decision importante aki di Avianca. "Mi por
bisa tambe cu esaki ta un deseo di President Santos ora mi tabata na Colombia algun siman pasa unda
nos a papia hopi di un combinacion di e destinacion turistico entre Aruba y Colombia. Tin un cantidad
creciente di pasahero cu ta bin di Estados Unidos y cu ta interesa den biahenan combina. Colombia ta un
destinacion ideal pa nan. Prome nan ta bin aki pa disfruta di nos beachnan pa sigui pa Colombia pa gosa
di e naturalesa y eco-turismo eynan."
Eman a bisa cu pa Aruba esaki ta un gran oportunidad pa amplia e cantidad di turista cu ta bin di
Colombia y na mes momento tambe ta un bon idea pa intercambia un vision unda Aruba por ofrece e
turistanan di Colombia biahenan combina. "Pa logra esaki ta importante pa tin mas stul. Cu Avianca ta
amplia su vuelonan ta un paso den e direccion ey." Eman a gradici sra. Martin y henter su ekipo pa e bon
decision aki cu ta un bon noticia pa turismo di Aruba.