Page 42 - AHATA

ORANJESTAD (AAN) — Minister Otmar Oduber, den entrevista cu DIARIO, a referi na e
impresion robes cu tin rond di e construccion di hotel na Colony, cu esaki lo trece
destruccion den naturaleza y cu lo reduci e acceso na Baby Beach pa nos mes
hendenan.

E dignatario a mira hopi publicidad incorecto tocante destruccion di e naturaleza den e
area menciona, por ehemplo riba e parti di fosfat. E mandatario a descarta esaki
indicando cu esaki ta hopi leu for di e lugar unda e hotel lo wordo traha.

E minister a splica cu loke tin eybao ta e tunelnan di awa, cu a wordo traha kibrando e
naturaleza e tempo ey pa e funcionamento di e refineria. E awa aki tabata wordo uza
pa fria y pa cierto procesonan di e refineria y no pasobra tin fosfat eybao. E intencion ta

pa no destrui nan tampoco, pasobra e por ta un atraccion, pero e no ta nada cu a
wordo traha pa naturaleza.

E dignatario a reitera cu enfasis cu pa ley e area aki a wordo designa pa construccion.

El a expresa cu cualkier momento cu tin construccion tin destruccion di naturaleza, sea
un cas, un mall, etc.

Locual mester percura ta pa limita e destruccion aki y mescos cu ora ta traha un

verkavelingsplan pa traha cas, mester tin un vergunning y si riba e tereno concerni tin
flora y fauna proteha, manera tuna cu ta un di e tiponan di mata proteha, ta pone como
condicion na e desaroyador pa yuda planta y conserva cierto plantanan manera esaki.

Den e area unda e hotel na San Nicolas lo wordo construi tambe tin e mesun
rekisitonan aki pa e desaroyadornan. Den e area aki tin cierto matanan cu mester
wordo conserva y hasta replanta den diferente caminda.

E mandatario ta corda tempo cu a traha e brug na Lagoen pa conecta e Green Corridor,
tambe a restaura y planta bek un cantidad di mangrove pasobra mester a corta algun
pa pone e brug.

Tocante e hecho cu tin hopi palapa riba beachnan pabao di brug, dilanti e hotelnan, cu
ta haci cu hopi hende local ta keha cu no tin lugar pa nan, e mandatario a subraya cu
gobierno no ta bay comete e mesun erornan aki, pariba di brug.