Page 24 - KPA DEC 8

Dia 28 novèmber e tim pa kombatí kriminalidat ku ta mina (TBO) di “Recherche
Samenwerkingsteam” (RST) den koperashon ku Landsrecherche St. Maarten i
bou di guia di un hues komisario a ehekutá un total di shete (7) entrada hudisial

den kuadro di e investigashon Emerald, inkluso na kas di e sospchoso, den
ofisinan di e outoridat di haf di Sint Maarten i na un kompania di seguridat.

Durante di e entradanan hudisial a konfiská dokumento, atministrashon,

portadónan di informashon digital i un arma di kandela. Adishonalmente a
konfiská sinku outo luhoso, algun kuenta bankario, un yate i kas di e
sospechoso. Outoridatnan na Anguilla, riba petishon di outoridatnan di St.

Maarten, a konfiská alabes propiedat inmóbil i kuentanan bankario di e
sospechoso na Anguilla.

E investigashon ta den ful swing i no por ekskluí e posibilidat ku mas aresto lo

kai of mas entrada hudisial lo tuma lugá. E investigashon Emerald a inisiá na
2016 abase di artíkulonan den korant i preguntanan den Parlamento riba un
kontrato entre e kompania di seguridat di e sospechoso i e outoridat di haf di

Sint Maarten. Durante di e investigashon aki sospechonan di froude ku
impuesto, falsifikashon di dokumento i labamentu di plaka a lanta.

E investigashon aki ta parti di esfuersonan intensivo i konhunto pa kombatí

froude i korupshon ku ta krusa frontera, esta kriminalidat ku ta mina.
Kriminalidat ku ta mina manera entre otro korupshon i labamentu di plaka ta
forma un problema serio pa seguridat i ekonomia di e pais- i islanan den Reino

Hulandes ku ta keda den Karibe.