Page 16 - UTILITIES 20 MAY 2017

Iluminacion a yega bario di Sero Preto na Paradera

Friday, 19 May 2017 20:09
Comparti

E programa Luz den Bario a yega Sero Preto diahuebs anochi ora cu e prome punto di iluminacion nobo
instala door di ELMAR a wordo cendi door di e hoben profesional Gerlien Croes, hurista y consehero di
maneho na Oficina di Relacionnan Europeo y Reino, y cu a lanta na Paradera, den e bicindario.

Bisiñanan di e percela Sero Preto 17-A y habitantenan di e bario a bini diahuebs anochi hunto na cas di
Maria van Broekhoven, unda cu den presencia di Prome Minister Mike Eman e luz a wordo cendi. “Awe
un otro bario di Aruba ta haya luz. E bario aki tabatin hopi aña den scuridad y unda cu nos a cana awe
durante dia, nan a bisa nos cu nan ta contento cu e bario ta bay haya su luz,” Prome Minister Mike Eman
a bisa despues cu mr. Gerlien Croes a cende e prome luz. E mandatario a expresa di ta sinti un
satisfaccion grandi cu un biaha mas Gobierno por a cumpli cu e Programa di Luz den Bario pa trece
claridad y siguridad pa e famianan cu ta biba den barionan cu no tabatin luz. “Nos lo sigui haci e trabou
aki pa mehora calidad di bida den cada bario di Aruba,” e mandatario a agrega. Mr. Gerlien Croes, kende
diabierna anochi a informa cu el a tuma e decision pa bay den servicio publico, pa sirbi pueblo di Aruba,
a bisa cu tabata un honor pa e por a cende e prome luz den Seroe Preto. “Mi ta kere cu esaki ta djis e
comienso di hopi mas proyecto cu ta bay tin pa Aruba. Pesey nos ta aki, pa sigui sirbi nos pueblo.”
Bisiñanan hunto a keda celebra e dia grandi aki pa nan bario despues di e ceremonia di e prome luz LED.

Dr. van Broekhoven ta biba den e bario di Seroe Preto for di 1992. “Mi ta hopi contento mes cu awe e
prome luz a wordo cendi y e resto di bario ta haya den e dianan cu ta bini. Seroe Preto ta un di e barionan
hopi scur y mi ta kere cu henter bario ta contento cu luz a yega. E iluminacion ta contribui na
siguridad,”el a expresa. Algo otro cu a hala atencion ta cu e dak tin varios panel solar, mustrando cu e
famia ta sigui vision di Prome Minister Mike Eman. “Nos tambe a pone panel solar y ta sperando
aprobacion di ELMAR. E ta algo semper nos tabata kier y nos a pone den ehecucion aña pasa. Nos ta
compronde tambe cu e ta tuma un tiki tempo pa nos haya full e beneficio. Den dia caba nos ta disfruta di
e beneficio di uzo di coriente produci pa e panelnan solar. Nos ta para 100% tras di energia berde y nos ta
apoya tur cos cu Gobierno actual ta haciendo pa nos di Aruba,”el a duna di conoce.

Comentarionan (0)
http://www.24ora.com/index.php?option=com_content&view=article&id=122023:iluminacion-a-yega-
bario-di-sero-preto-na-paradera&catid=12:politica&Itemid=18