Page 38 - HOH

ORANJESTAD – Stichting Onroerend Goed Aruba (SOGA) a keda sorprendi cu
declaracion di director di Hospital Horacio Oduber (HOH), Ezzard Cillie, riba e
asunto di falta di cama. E sorpresa mas tanto, segun Jassy Simon di AIB, ta cu ta
culpa SOGA, siendo cu ta HOH ta esun cu a duna cuenta, cuanto cama mester pa e
proyecto di construccion y renobacion. “Hospital ta full informa riba e cantidad di
cama, y no por ta asina cu awor ta bin pone e responsabilidad riba SOGA”, Simon a
bisa.

E SITUACION

Segun Simon, na comienso di e proyecto tabata conoci cu e construccion lo a tuma lugar
den fase, y cu lo yega na un punto cu lo tin temporal 30 camber menos pa acomoda
pashent. “Hospital tabata consciente di esaki y a indica di ta prepara pa esaki”. Despues a
surgi peticion di HOH pa bin cu algun cambio den e proyecto, esta na comienso di 2017.
Aki ta unda cu hospital a pidi pa ubica e ICU (Intensive Care Unit) y Acute Dialysis riba
e di 5 piso di e edificio nobo, esta e ‘new bed tower’. E tabata destina pa ta solamente
ocupa pa pashent cu tur cama necesario. SOGA a bisa HOH e tempo ey, cu si haci esey lo
tin dado momento menos cama pa pashent, y HOH no tabatin problema cu esey y cu nan
lo busca solucion. Diripiente awor, hospital a informa SOGA cu e specialistanan lo no
muda y cu ta SOGA su responsabilidad pa busca un solucion. Segun SOGA, aunke cu a
adverti di esaki, no a haci nada di parti di HOH pa remedia e situacion. “SOGA a haya su
mes, ta yuda busca un solucion pa e falta di cama aki, pa no enfrenta mas retraso riba e
proyecto. Y segun SOGA nan ta ehecutando e proyecto basa riba e rekisitonan cu propio
HOH a stipula y nan ta full informa riba e situacion. Pues no por bin culpa SOGA awor
pa e ‘shortcomings’.

RETO

SOGA a bisa tambe cu nan ta consciente cu e proyecto ta un reto, specialmente cu mester
renoba y construi riba un edificio existente, cu no por para su operacion unda cu tin
hende malo ta ‘hospeda’, y e trahadonan ta trahando. A haya e edificio bieu den un mal
estado, y aworaki sin cu tin tur mapa disponibel, a sigui traha, no obstante e hecho cu e
contratista a hay’e cu yen di sorpresa. Pero SOGA tin e prioridad pa caba e proyecto den
un forma exitoso pa por sirbi comunidad. Asina Simon a finalisa bisando.