Page 14 - WEB

Den e ley aki lo cobra usuarionan Afls. 7,50 pa piki sushi y Afls. 17.50 pa procesa sushi
(vuilverwerking). Aki esnan cu nan sushi ta ser recogi dor di un otro compania cu no ta
Serlimar, den e caso aki EcoTech, lo mester paga Afls. 17.50 extra. Esaki ta un castigo y
medida riba lomba di nos ciudadanonan.

Ademas en bista cu segun e ley Serlimar so lo bay ocupa su mes cu procedamento di
sushi y no otro compania e ley lo duna Serlimar un monopolio y e “cost of doing business
lo bira asina halto cu e otro compania priva lo no sobrevivi. E chens ta alavez hopi grandi
cu lo bay over na kita trahadornan.

Durante e demostracion e trahadornan tabata emocional over di e asunto aki, nan tin
miedo di perde nan trabou. Ta trata di mas di 6000 mil cliente cu si nan no keda cu e
compania, esaki lo sufri consecuencianan financiero.

Un otro argumento t’e otro medida di Gobierno riba nos pueblo, cual t’e sugar tax.
Lo trece 33 miyon den caha di Gobierno mientras cu esaki lo tin un impacto devastador
riba cartera di nos hendenan humilde y riba e compania local cu ta produci refresco na
Aruba.

E sugar tax aki no ta parti di un maneho balansa riba e tereno di prevencion di obesidad
of otro malesanan cronico. Introduccion di sugar tax banda di hisa prijs di bebidanan pa
nos pueblo, lo hisa e cost of doing business di e compania dor di cual lo bay over na kita
trahadornan.

Fraccion di AVP tabatey ora cu e trahadornan a entrega un carta na Presidente di
Parlamento. Parlamentarionan lo mester entrega preguntanan riba e ley no mas tarda cu
awe dia 23 di september. Despues di esaki Gobierno lo contesta e preguntanan den un
“Nota naar aanleiding van het verslag” y asina cu esaki yega Parlamento e Presidente di
Parlamento aki complaciente cu Gobierno lo yama e reunion mas pronto cu ta posibel.
Awor cu Gobierno ta mira cuanto reaccion di preocupacion tin pa e ley ta di spera cu e
recapacita pa no pusha e medida aki den stoma di nos pueblo. Pasobra nos pueblo no por
wanta mas medida.

Costo di bida a bira mas halto. Prijs di comestibles a subi, prijs di awa y coriente a bira
mas halto, prijs di gasoline a bolbe subi. Asina bo por sigui menciona y sin cu Gobierno
ta bin cu ehercicio pa baha propio gasto of alternativanan pa mehora nos economia.