Page 37 - DE MEZA

Friday, 02 December 2016 17:17
Comparti

Diaranson ultimo Cosecha San Nicolas a habri su portanan. Cosecha ta un fundacion cu ta bende arte y
artesania local cu tin e Seyo nacional di Aruba y na San Nicolas tambe tin un espacio pa duna workshop,
dignamente dota cu e nomber Creative Center.

Joanne Dirksz directora di Cosecha a splica mas di e localidad y tambe a conta un tiki mas di e workshop
area na San Nicolas. E localidad nobo aki ta diferencia su mes di e localidad na Oranjestad. Oranjestad ta
mas un tipo galeria y ta situa na e monumento na Zoutmanstraat 1 y San Nicolas tin mas un “look”
industrial y manera a menciona tin un area pa por duna workshop. E idea ta pa Cosecha San Nicolas
ofrece diferente workshop den futuro pa tanto adulto como mucha. Pa e temporada di fiesta ja caba tin
workshop ( decoracion di Pasco pa kertsboom cu driftwood) riba schedule pa muchanan di 8 pa 12 aña cu
e artesano Maria Onni dia 10 of dia 17 di December. E directora a duna un danki na su team di tanto
Oranjestad como tambe e team nobo di San Nicolas cu a traha hopi duro pa e dia tan especial aki.
Naturalmente tambe a duna un danki na e artesanonan cu ta traha cu hopi amor y pasion. Sin lubida un
danki special na Aruba Ports Authorithy cu ta sostene nan, tur instancianan, personanan cu semper ta
apoyanan y naturalemente e miembro nan di board.

E proyecto di Cosecha ta uno masha bunita y awo cu un localidad mas unda no solamente por cumpra
artesania y arte pero tambe por pasa un rato placentero tumando un workshop. Minister de Meza tawata
tey presente pa asina conhuntamente cu e team di Cosecha corta e sinta. E invitadonan por a mira e
localidad, productonan cu Cosecha San Nicolas tin pa ofrece y alavez a haya e oportunidad pa por
demostra nan talento y juda traha bunita mascaradanan y cuadranan hopi creativo cu lo por wordo
observa den e tienda. Un y tur ta keda cordialmente invita pa bishita Cosecha San Nicolas den Trilax
building, B. v/d.Veenstraat 20. Pa mas informacion di Cosecha San Nicolas por contact nan na 5878708
of manda un email na arubacosechasn@gmail.com