Page 54 - ATA
P. 54
*Mas prueba cu na 2016 Maduro a uza Citgo pa haya placa
ORANJESTAD (AAN) — Tur desaroyo ta confirma cu regimen Maduro nunca tabata tin
placa pa cumpli cu e acuerdo cu gobierno di Aruba a cera cu Nicolas Maduro, cu manera
a bini dilanti den Corte na Merca, mester por identifica directamente cu Citgo.
No ta medidanan di Merca a hinca Citgo di Aruba den problema, pero realidad ta cu
Citgo, PDVSA, Venezuela y tur loke por cay bou union cu Hues na Merca a identifica,
no tabata tin placa pa cumpli cu e proyecto for di momento cu nan a firma.
Ayera e Fiscal General di Venezuela cu a busca su refugio na Colombia a base di e
situacion peligroso na su pais, a pidi Presidente Interino Juan Guaidó pa manda prueba
di e forma cu ta paga e debe na e grupo di financiadonan cu na 2016 a duna Maduro
placa cu Citgo como borg mientras Rusia a haya e resto di Citgo como borg.
E acuerdo cu gobierno Mike Eman a firma cu Nicolas Maduro tabata completamente
basa riba financiamento cu Maduro mester a busca na momento cu debenan di e pais
tabata cera tur porta pa Maduro.
Pruebanan cu tin riba mesa ta mustra cu hasta si no tabata tin medida Mericano contra
Maduro, no tabata tin placa pa el a cumpli.
Asamblea Nacional di Venezuela awor mester paga e interes riba e prestamo 2020 cu
Nicolas Maduro a haci cu financiadonan Mericano y dentro di tres luna mester pone un
suma di tres bes loke nan ta paga awor riba mesa.
DIARIO ta publica prueba di e documento cu e Fiscal General di Venezuela na Colombia
a manda pa Guaidó den cuadro di e transparencia cu awor ta necesario despues di e
abuso cometi cu placa di pueblo Venezolano dor di Juan Guaidó.
E tempo cu Aruba a negocia e contracto, ya Chavez kier a bende Citgo como mal
negoshi pero Nicolas Maduro a uza Citgo pa haya placa riba mercado di prestamo.
E acuerdo cu Citgo a wordo alcansa tempo cu Citgo tabata dirigi pa Nelson Martinez, cu
despues Nicolas Maduro a acusa di corupcion y a tira den prizon caminda el a muri.
