Page 41 - ARUBA BANK

Minister Plasterk satisfecho cu rapport CAft riba presupuesto
2017

Wednesday, 22 February 2017 19:37
Comparti

Minister di Asuntonan di Reino Ronald Plasterk tabata na Aruba pa dos dia. Dos dia cu un agenda pisa.
Entre nan un bishita na Prome Minister di Aruba Mike Eman. Manera ta conoci CAft a saca un rapport
masha positivo encuanto presupuesto 2017 di pais Aruba cu tin un deficit di 0,5%
cu perspectiva di un surplus otro aña. Asuntonan masha positivo pa loke ta finanza di pais Aruba.
Minister Plasterk a bisa di ta satisfecho cu e bon trabou haci, cu el a califica como un 'knap staaltje werk',
pa cual el a duna Minister Bermudez un compliment.
Despues di su encuentro largo cu Minister Eman, Minister Plasterk a bisa cu e reunion a bay den bon
ambiente. "Minister President Eman ta un di e factornan stabil mas importante den Reino. Den otro
partinan di Reino tabatin varios cambionan politico y gubernamental, pero Eman ta riba su puesto algun
aña caba." Plasterk a sigui bisa cu Eman ta un persona masha envolvi pa loke ta relacionnan den Reino.
Nan a papia mas cu solamente riba asuntonan cu ta regarda Aruba. "Tabata inspirativo pa a papia cu ne
riba e diferente cuestionnan cu a bin dilanti."
Pa loke ta e ultimo rapport di CAft Minister Plasterk a bisa cu Aruba ta cumpli cu e criterianan. Apesar cu
ainda tin algun reto pa e añanan cu ta bin, e rapport aki ta un paso importante. Pa loke ta prestamo riba
mercado internacional contra un tarifa di interes mas abou, bou inscripcion di Hulanda, Plasterk a bisa
cu tur pais - tambe Hulanda - tin un sorto di control pa por presta placa riba e mercado di capital. "Mi
intencion cu e trayecto aki ta cu na cierto momento nos ta yega na e punto cu Aruba tambe por presta
riba e mercado di capital bou inscripcion Hulandes. Esey ta yuda tambe cu e presupuesto. Esaki ta e
trayecto y mi ta spera cu nos por finalise awor."