Page 43 - ARUBA BANK 16 MAY 2017

Minister di Asuntonan Economico y Comunicacion ta felicita
ganado di Hackathon Oranjestad

Monday, 15 May 2017 20:47
Comparti

Diasabra atardi Minister di Asuntonan Economico y Comunicacion mr. Richard Arends a anuncia personalmente e
ganado di e competencia ‘Hackathon Oranjestad’.
E evento organisa pa e Ministerio aki hunto cu Camara di Comercio tabata dos dia caminda cinco ekipo a trece
ideanan dilanti, a prepara un plataforma y a haci presentacion pa un hurado di miembronan capacita, scoge esun
miho. E miho a resulta di e aplicacion ‘Monumnts’ cu ta permiti peatonnan den centro di ciudad pa conecta cu
estatua, monumento y edificionan pa haya informacion, pero tambe ofertanan for di tiendanan.
“Hopi contento cu e entusiasmo y energia di e cinco ekiponan pa presenta solucionnan pa crea mas actividad, mas
movecion di hende den caya grandi; un economia di conocemento y un economia di experiencia, esey ta loke nos
a wak awe,” asina Minister mr. Arends a indica. “A bin cu solucionnan ‘out of the box’ y innovativo. Tur cinco ta
bal la pena pa explora y pa sigui desaroya e prototiponan. Nos por facilita y apoya tur cinco, paso mi ta kere cu tur
por tin un contribucion den e actividad economico di Caya Grandi,” asina e titular di Asuntonan Economico a duna
di conoce.
Minister mr. Arends tabatin comprension pa e trabou duro cu e cuerpo di hurado tabatin. Tur e idea tabata
resaltante y a scoge a base di un criteria cu a inclui e aspectonan di economia di experiencia, trafico peatonal,
aumento di actividad comercial, diversidad cultural y sostenibilidad. E siguiente paso den e proyecto aki di
Hackathon Oranjestad ta pa yuda e ekipo ganador pa registra nan idea y busca financiamento pa e concepto
wordo comercialisa.
“E conceptonan aki mester wordo comercialisa. Hopi di nan a bin cu nan ‘business plan’ y ta bay yuda pa wak di ki
forma por haya financiamento pa e proyectonan. Algun di nan tin financiamento caba, otronan falta
financiamento. Nos ta bay yuda pa yega na entidadnan financiero cu e idea aki pa wak si pa nan tambe ta ‘make
sense’ y si nan mester di mas ayudo, nos tin Qredits na Aruba cu por facilita y asisti den e parti financiero,” asina
Minister mr. Arends a duna di conoce.
Ministerio di Asuntonan Economico y Comunicacion ta gradici Bureau Innovatie y Camara di Comercio pa nan
confiansa den e proyecto, na patrocinadonan Gianni’s Group y Subway Aruba pa nan contribucion, na e
miembronan di hurado pa nan esfuerso, na e participantenan pa aporte valioso y na tur cu a duna un man pa haci
di Hackathon Oranjestad un exito cu pronto Oranjestad lo cuminsa mira su frutonan.