Page 25 - SOLO DI PUEBLO

Diahuebs 16 Maart 2017 Pagina 25
E paloma mensahero

Sinta ariba seroe di tanki awa na Savaneta
admirando e paisahe di naturaleza
contemplando nos bandera di leu
y scuchando nos himno
Un paloma a bin banda di mi
ta wak y loer rond
direpente a cuminsa fluister

"unda e bandera original a keda?"

Wel paloma bunita di nos naturaleza
lagami contabo
a cambia nos bandera original
pa uno sin balor y historia

A duna nos un otro color

na lugar di nos color blauw licht
color domina como "larkspur"
escogencia di Betico Croes

E paloma a bin para ariba mi cabez
y a bisami esaki:
"Dia cu mi a cay, mi no a cay por nada
mi a cay, garando nos bandera"

Mi a gara e paloma y pone den mi man
y mi a bise: Balor y sacrificio ta hopi sagrado
mescos cu nos Himno y Bandera
y nos Libertador

Un color di bandera cu a wordo cambia

un color cu no ta duna admiracion
un color morto den halto
y awe nos ta celebra su dia

Paloma bunita di nos naturaleza
bo por compronde mi tristeza awor?
Betico lo a consulta su pueblo
y duna nos locual e pueblo kier

Nunca mi a biba pensa
cu hendenan cu otro mentalidad
lo kier caba cu e nomber di Betico Croes
e persona cu a duna nos e Himno y Bandera

Paloma bunita di nos naturaleza
cua ta bo mensahe pa nos pueblo?

"Nunca perde speranza den bida
E cambio ta bin den un cera di wowo"

Mi a tene e paloma duro den mi braza
y mi a lag'e bula bay
den tur libertad di mundo
mescos cu nos flor di libertad

Pero mescos cu e paloma
a bula bay a bolbe bek un rato despues
y a bisami cu Betico Croes a bin pa keda
cu su bandera y himno pa semper!