Page 8 - MIN VOS

Yokosuka- Hapon. Na cuminsamento di anjanan 90 e deporte di windsurf tawata hopi popular na
Hapon. Finalmente despues di 24 anja E aerolinea Fly ANA ta anfitrion huntu cu Keikyu Corporation y
ciudad di Yokosuka di e PWA Fly ANACopa Mundial di Windsurf na Tsukuihama beach.

Desde 11 te cu 16 di mei e competencia di PWA na ASIA ta continua na Hapon despues di e evento na
Sur- Korea. Instrumental pa e deporte di vela ta biento y atrobe biento mescos cu siman pasa na Sur
Korea ta hopi impredicibel cu ta trece hopi momento di wardamento. Asina cu e biento a lanta ariba dia
13 di mei diferente qualificacion a tuma lugar Sarah-Quita ta corre dos manga pa qualifica y ta pasa pa e
final di ganadornan di e promer eliminacion. Decisivo ta e salida. Mester evita di ta den posicion delanta
y na mes momento evita di drumi den luz pa otro regatista no tap’e, kitando e biento. Sarah-Quita tin su
holoshi sincronisa ariba e seconde. Manera un flecha e ta sali tira bai pa yega e boei como promer. Desde
principio te fin e ta na cabez di e carreda y di nobo mescos cu el a hasi na Sur-Korea e ta cementa su
dominio ganando e promer eliminacion.

E comentario ta cu e regatista di 25 anja di Aruba ta cuminsa su temporada di competencia bon y ta
defende su titulo di campeon mundial di slalom 2016 na perfeccion. E di dos eliminacion ta pendiente pa
corre ya cu 8 regatista femenino a clasifica pa e carreda final di ganadornan. Ya tin dos dia caba cu no por
corre e careda aki pa via di e biento debil cu ta supla. Na Hapon e biaha aki si a logra hanja resultado den
e categoria masculino. E atleta frances di Saint Maarten Julien Quentel ta gana e promer eliminacion.
Finalmente Sarah-Quita a sa di capitalisa ariba e unico oportunidad cu a presenta y trese Victoria pa
Aruba. Huntu cu JulienQuentel di SXM, Caribe a briya na lehano Oriente.