Page 23 - HOSPITAAL

Menor Di Edad A Sali Di Coma

 Politica
- 30/08/2018

E mucha muhe cu a sufri un accidente na Aruba mas o menos dos siman pasa, ta mustra
señalnan di mehoracion. Esaki por a lesa den publicacion di prensa di Puerto Rico.

E mucha muhe Jednnielys Pérez Rivas di 7 aña, a sufri accidente ora cu el a yega Aruba
abordo di un crucero. El a lanta for di e coma induci diaranson atardi y a reacciona
satisfactoriamente na stimulacionnan motorico moviendo su brasanan, pianan y a habri su
wowonan pa algun seconde.

Esaki a wordo confirma door di tanto su mama Alexandra Rivas, como su wela. E menor
ta interna den Cuido Intensivo ainda di Hospital Pediátrico Doctor Hugo Mendoza di
Centro Medico na Río Piedras.

“E ta seda bou remedinan, pero esey no ta asina tur momento. Cu el a reacciona riba
cierto sistemanan motorico ta un bon señal di recuperacion,” e mama a expresa.

Nan a menciona cu loke ta sigui awo ta un evaluacion neurologico cu un estudio di MRI
cu cual ta midi tur e actividadnan di su organismo. Esaki ta wordo haci pa mira si e no tin
algo otro cu no a wordo mira riba e potretnan radiografico. Esaki lo wordo haci na
momento cu kita un metal cu a wordo poni na pia di e menor pa e tejidonan seca bon.

Tambe e mama a expresa cu pa loke ta e accidente mes, autoridadnan di Aruba tin un
silencio hermetico cu pa nan di famia ta resulta hopi sospechoso. “Nan tin tur cos bon
secreto, ni sikiera nan no kier a entrega nos un copia di e rapport policial. Pa nos ta dificil
pasobra nos ta haya mita informacion. Un dia nos lo mester bay te aya pa mira loke ta
pasando, pasobra nos ta sinti cu nan ta scondiendo algo,” e mama a bisa.