Page 81 - MIN SOC

Telefon pa Hubentud hopi contento pa oportunidad cu MFA
ta duna treciendo informacion den bario

Wednesday, 25 January 2017 20:03
Comparti

Sherman Milliard, representante di Telefon pa Hubentud, a hiba palabra durante e conferencia di prensa
pa anuncia e serie di charlanan titula Siman di Informacion. Esaki ta un programa cu ta bay inicia
proximo siman y lo core te den luna di juni.

E ta un iniciativa di MFA Noord y MFA Paradera, bou direccion di Ministerio di Asuntonan General.
“Nos ta hopi contento cu nos mag di participa den e proyecto aki di MFA. Telefon pa Hubentud mescos
semper, ta participa cu proyecto cu ta pa hobennan di Aruba y pa e comunidad di Aruba y nos ta hopi
contento cu un luga asina moderno, asina nobo tambe cu ta acerca diferente fundacion pa duna nan
informacion,” Milliard a bisa.

E organisacion ta haya cu e idea aki ta algo hopi bunita ya cu ta un luga cu ta di e bario mes ta acerca un
Telefon pa Hubentud y asina no solamente hendenan cu ta den nos grupo di enfoke, pero tambe cu no ta
den e grupo di enfoke, por haya e informacion cu Telefon pa Hubentud tin pa duna. Normalmente nan ta
traha tur dia entre 2’or y 6’or di atardi. Pa medio di e charlanan cu ta bay duna den MFA, e organisacion
ta sinti cu por yega tambe na adultonan cu por comparti e informacion cu nan yiu, sobrino of bisiña.

Trahando tur dia cu mas di 25 boluntario, Telefon pa Hubentud ta atende yamada di mucha y hoben
entre e edad di 8 pa 24 aña. Dor cu e grupo di enfoke ta asina amplio, nan tin hopi experticio y
conocemento pa comparti. Dia 31 di januari na MFA Noord lo cuminsa cu introduccion di e organisacion
y nan trabou. Despues lo sigui charlanan riba e tema ‘Norma y Balor’, ‘Cyberbullying’ y ‘Positive
Thinking’, entre otro. Un parti di e charla tambe lo ta dedica na pone luz riba hobennan cu tur dia ta
haciendo algo bon y ta riba e caminda corecto, pasobra esey tambe ta necesario.

Pa mas informacion di e charlanan di Telefon pa Hubentud y di otro organisacionnan, ta invita pa keda
atende na prensa local, y bishita e pagina di MFA Noord Aruba y MFA Paradera Aruba riba Facebook.