Page 40 - HOSPITAAL
P. 40
ORANJESTAD (AAN): Durante e reunion general di miembrecia di Women’s Club of
Aruba (WCA) pa luna di november, Sr. Jurgen Benschop, presidente di Fundacion
Contra Cancer di Prostaat, den compania di e miembronan Sr. Cesar Angela y Sr. Milo
Croes a duna un charla informativo tocante cancer di prostaat.
E charla aki ta den cuadro di e “Movember movement” caminda hopi hende homber ta
laga bigoti y barba crece durante luna di november pa yuda concientisa comunidad
tocante e riesgonan di cancer di prostaat y otro tipo di cancer y malesanan cu ta afecta
hende homber.
E presidente di e fundacion, Sr. Benschop, a acerca WCA pa duna e charla, pasobra e
fundacion ta wak e importancia cu e rol di e hende muhenan tin den prevencion di e
malesa aki.
Ora un hende homber tin mas of menos cincuenta aña , ta importante pa e haci un
chekeo anual pa check e nivel di su PSA (prostate specific antigen).
Un test di sanger ta duna un indicacion di e funcionamento di e prostaat. Si e nivel ta
mustra mas halto cu normal, e dokter di cas por dicidi di laga haci mas test specifico.
Ta hopi importante pa haci e control, pasobra ora e pashent cuminsa experiencia e
sintomanan, e cancer por ta den un estado avansa caba.
