Page 27 - AM191005

Diasabra, 5 October 2019 AWEMainta 27

UN SNECHI DI PALABRA DI DIOS

XXVII DIADOMINGO ORDINARIO

1 lect: Hab 1, 2-3; 2, 2-4
Salmo: 95
2 lect: 2 Tim 1. 6-8. 13-14
Evangelio: Lc 17, 5-10

Un dia e discipelnan a bisa Señor Hesus: “Laga nos fe crece.” Anto Señor a bisa nan:
“Si boso fe tabata mes grandi cu un pipita di moster, boso lo a bisa e palo grandi aki:
„Sali for di tera cu reis cu tur y planta bo mes den lama‟ y e palo lo a tende di boso.
Cual di boso lo bisa boso sirbido cu ta ploeg tera pafo of cuida carne pa boso, ora e
yega cas for di cunucu: „Bin mesora bin sinta na mesa‟? Ningun hende! Mas lihe bo ta
bis‟e: „Prepara mi cuminda pa mi; faha bo lomba y sirbi mi, te ora mi caba di come y
bebe. Despues bo tambe por come y bebe. ”Acaso bo ta yama bo sirbido danki,
pasobra el a haci loke a orden‟e? Mescos asina boso tambe mester bisa, ora boso a
haci tur loke a ordena boso haci: “Nos ta sirbido inutil! Simplemente nos a cumpli cu
nos deber!‟”

Palabra di Señor!

MENSAHE

Ora apostelnan a pidi Hesus aumento di fe El a bisa nan: “Si
boso fe tabata mes grandi cu un pipita di moster, boso lo a
bisa e palo grandi aki: „Sali for di tera cu reis cu tur y planta bo
mes den lama‟, y e palo lo a tende di boso.” Na prome luga pa
medio di e contesta aki Hesus ta haci nos consciente cu don
di fe ta sumamente importante den nos bida. E ta haci nos
capaz di haci cosnan grandi. Nos sa cu ningun di nos por
ranca un palo grandi cu su reis y plant‟e den lama.

Pero fe ta haci nos capaz di haci cosnan cu humanamente ta
imposibel. Un hende cu ta pensa cu tur cos ta depende di dje
mes y cu e por hacie semper manera e kier, nunca por compronde kico kiermen fe den
Dios. En cambio, en cuanto nos ta reconoce cu nos ta den sirbishi di Dios y ta haci
esey cu humildad y obediencia e ora ey nos lo ripara e poder di Dios cu ta obra den
nos y pa medio di nos.
P‟esey tambe Hesus ta siña nos e actitud corecto di fe den Dios: “boso tambe mester
bisa, ora boso a haci tur loke a ordena boso haci: „Nos ta sirbido inutil! Simplemente
nos a cumpli cu nos deber!‟” E ora ey nos lo ripara cu nos ta participe di cosnan grandi.
Por ehempel di nos mes nos no por biba ni un seconde, di nos mes nos no por stima,
di nos mes nos no por siña, etc. Asina cu cada momento di nos bida ta un milager, ta
algo extraordinario.
P‟esey tambe nos mester entrega nos bida den man di Señor, permiti p‟E dicidi pa nos,
confi‟E cu tur cos cu E lo dicidi den nos bida ta pa nos bienestar. Hende sin fe cu kier
dirigi nan bida, finalmente lo sufri fracaso.
Hende cu ta confia Dios, aunke nan ta pasa momentonan dificil, nan ta trankil, pasobra
nan ta sigur cu loke Dios ta manda semper ta pa nos bienestar spiritual y salbacion
eterno.
Precisamente, fe ta duna nos e seguridad aki, pasobra kere kiermen: ‘ta sigur di

cosnan cu nos ta spera’ (Hebr 11,1).

ORACION

Señor, aumenta mi fe!

PROPOSITO

Evalua bo fe den Dios, bo fe den bo mes, den otro y den
cosnan material pa logra un fe sano den Dios.