Page 11 - AHATA 30 JAN 2017

Pop up-Clean Up na Savaneta

Sunday, 29 January 2017 09:20
Comparti

Pop Up-Clean Up a tene su di ocho accion di limpieza 13 di januari 2016. A toca turno e mondi den e bario di Zeewijk
rond di Mariniers Kazerne Savaneta, consistiendo di 10 boluntario, di cual un gran parti tawata mariniers. Un danki
ta bai atrobe na AHATA y Fundacion Aruba Limpi cu ta sponsor e materialnan. Danki tambe na Paul Vlaar cu a
acerca Pop Up Clean Up pa organisa e clean-up y sin lubida su coleganan cu a duna un bon man.

Danki na Mariniers Kazerne Savaneta pa sponsor saco extra large y pa di ultimo nos boluntarionan fiel cu ta bin cada
clean-up y esunnan nobo.

Den un lapso di 3 ora a logra limpia mayoria parti di e mondi y a jena 15 saco extra large cu ta mas o menos 30 saco
completo cu sushi mane boternan, bleki, saco di plastic y hopi foambox. Tambe 4 televisión, bari di azeta bashi,
articulonan di cas etc.
Locual cada biaha ta ripara ta cu generalmente no ta e hendenan di e bario mes ta contamina e mondinan pero ta e
hendenan cu ta hasi uso di e caminda na pia of den auto. E biaha aki a bin topa cu ambos situacion.
Den e bario tin un container di sushi desponibel, cual lastimamente no ta wordo uza dor di e habitantenan. Sushi ta
acumula rond di e container, enbes di den dje. E ta di lamenta cu no a haja boluntario for di e bario mes pa yuda pa
haci nan bario limpi.

Den e bario cu ta wordo susha door di hende cu ta pasa na pia of auto por a wak e manera un dump chikito cu asino
hopi sushi nos a piki den un distancia chikito. E sushi a ser haya patras y rond di un cura bandona pero hopi cerca di
caminda. Testigo ta bisa cu trahadornan di construccion ta come bou di e palo y tira nan sushi riba vloer of patras di
muraya. A bin haya hopi take away foambox na e sitio aki. Cada biaha Pop Up-Clean Up ta keda sorprendi cu e
mentalidad di hendenan cu ta biba riba nos isla unda ta pensa cu ta oke pa tira bo sushi unda cu ta. Por wak cu nan
sa cu no no ta permiti, mirando cu nan ta haci esaki scondi. Esaki ta e desafio mas grandi cu Pop Up-Clean Up tin;
cambia e mentalidad di nos comunidad ora ta trata di tira nan sushi afo.
E meta di e cleanup ta pa motiva hende pa cuida y laga e mondinan limpi y conscientiza e hendenan den bario pero
tambe henter Aruba. E idea ta tambe pa e hendenan di e barionan mes keda mantene e mondinan y confronta
esunan cu ta susha. Habitantenan mester sa cu nan por yama polis of City Inspector ora ripara cu no ta bin cambio
den e situacion.
Pop Up-Clean Up ta un iniciativa di hobenan profesional cu a bin hunto pa activa comunidad pa tene Aruba limpi
dor di crea conciencia, responsabilidad y promove dialogo entre habitantenan, comercio i instancianan
gubernamental .
Pa mas informacion riba e actividadnan di Pop Up-Clean Up y e proximo accion di limpieza, por bishita e Facebook
page di Pop Up-Clean up.