Page 11 - RDA UPDATE DEC 5 2016

Siman pasa a inaugura Christmas Village na San Nicolas

Sunday, 04 December 2016 14:35
Comparti

"Christmas Village 2016" a habri diahuebs ultimo dia 1 di December den Carnival Village na San Nicolas y lo sigui te
cu dia 6 di januari 2017. Esaki ta un regalo di Refineria di Aruba N.V. y Fuels Marketing & Supply Aruba N.V. na
henter e comunidad di Aruba, pero specialmente pa San Nicolas y pariba di brug.

A combina esfuerso cu Carubbean Festival cu a muda pa un dia for di caya grandi di San Nicolas pa Carnival Village,
ya cu esey tabata e ultimo festival pa e aña aki tambe. Tabatin presentacion di 4 grupo di gaita, entretenimento, bar y
cushina bon surti y acerca tabatin e schaatsbaan pa muchanan.

Mester bisa si cu e publico presente a gusta e cambio masha y a sugeri cu no ta un mal idea pa evalua tene e
Carubbean Festival eyden mes den futuro. E comentarionan tabata varia entre e visibilidad pa mira e bandanan ta
miho eyden, e zonido ta miho y como cu e luga ta cera, ta mas sigur tambe.

Separa di entretenimento, a decora e luga den ambiente navideño, incluyendo hopi decoracion di luz, musica di
Pasco y sin lubida un kerstboom di mas cu 20 pia di haltura.

Teniendo cuenta cu dianan di fiesta, lo no tin evento riba dianan 24, 25, 26, 30, 31 di december 2016 y 1 di januari
2017 tambe lo ta cera.

Probechando cu scol ta cera dia 15 di december, ta organisa un competencia entre studiantenan riba dianan 16, 17 y
18 di december. Lo dedica e weekend na hubentud. E scol ganado lo gana un premio efectivo cuantioso. Scolnan
secundario na San Nicolas, esta MAVO y HAVO, klasnan 1-2 y 3-4 lo competi den baile, canto y obra teatral.

Christmas Village ta habri tur dia, cuminsando for di 6:30pm caba. Bishit’e!