Page 23 - DESPA

Ampliacion di hospital ta mas cu un edificio nobo. E ta pone

pashent y trahadornan na prome luga

Tuesday, 25 April 2017 18:06
Comparti

Un di e aspectonan cu mas a complace Prome Minister Mike Eman durante su recorido den e edificio
nobo di pashent di Dr. Horacio Oduber Hospital, ta e avancenan haci teniendo cuenta cu e bienestar di e
pashent y su famia, pero tambe di e propio personal cu ta bay traha eyden.

“Prioridad a wordo delinea pa garantisa e calidad di servicio cu nos kier,” Minister President a comenta.
E acomodacionnan den e ‘Bed Tower’, cual ta e edificio nobo mas halto di e dosnan cu a wordo construi,
ta impresionante. Esnan cu a forma parti di e recorido, manera Minister Sevinger di Infrastructura,
Schwengle di Salud, directiva di Aruba Investment Bank, Stichting Onroerend Goed Aruba, entre otro, a
remarca con nan ta sinti nan mes den e hospital di un ciudad grandi manera na Merca of Europa. Entre e
cambionan mas bisto ta cambernan di un te dos cama so loke sigur ta bay haci un diferencia grandi den e
privacidad di e pashent y esnan cu ta bishit'e, pero tambe ta hunga un rol importante den control di
malesa y bacteria ora cu ta necesario. “Nos tur a yega di pasa den e experiencia cu hopi ansiedad cu nos
famia malo y hopi nervioso y cu no tin caminda pa sinta,” Prome Minister Eman a remarca y relaciona cu
esey, cada piso di e edificio nobo ta conta cu un sala di bishita of pa warda na cada extremo. Nan ta
espacioso y comodo, brindando un experiencia mas agradabel ora di haci bishita y tambe pa pashentnan
cu tin mobilidad. Adicionalmente, a tene hopi cuenta cu e facilidadnan di trabou pa e personal medico. E
arkitecto, den relacion estrecho cu Minister di Salud, directiva di Hospital y Hunta di Supervision, a
percura pa un camber destina pa dokternan dialoga riba diagnostico di nan pashentnan den e edificio ey,
den tur privacidad. Enfermeronan tambe ta bay conta cu un espacio di trabou hopi mas amplio na loke
nos conoce awo. E asina yama ‘nurses station’ ta varios biaha mas grandi y ta conta cu tur e facilidadnan
tecnico pa por duna e sosten importante cu pashent y dokternan di e piso tin mester. Esaki sigur lo trece
un ambiente di trabou hopi mas practico y profesional cu ta encurasha productividad. Prome Minister
Mike Eman ta felicita tur esnan envolvi den diseño y ehecucion di e proyecto di ampliacion di Dr.
Horacio Oduber Hospital pa un bon trabou y ta ansioso di por cuminsa laga tur hende cuminsa wak e pa
nan mes previo na e aperturanan oficial.

http://www.24ora.com/index.php?option=com_content&view=article&id=121174:ampliacion-di-
hospital-ta-mas-cu-un-edificio-nobo-e-ta-pone-pashent-y-trahadornan-na-prome-
luga&catid=12:politica&Itemid=18