Page 64 - MIN ECEM

E aña aki ta un aña di hopi decision, un aña cu e pueblo di Aruba por ta mas estricto y
critico riba maneho di Aruba. E aña aki dia 22 di September ta e dia di eleccion, nos
como ciudadano na Aruba por pone nos voto di confiansa pa por goberna Aruba Nos
Pais unda cu nos tur ta biba riba dje. Aruba ta forma parti di Reino Hulandes
y Gobernador ta e representante di Rey na Aruba, Gobernador ta e organo di mas
halto na Aruba y e mester tin su respet. Na Aruba cada pasa 4 aña e pueblo por scoge
un gobierno cada cuatro aña tin eleccion pa miembro di Parlamento. Parlamento
conhuntamente cu Conseho Social Economico (SER), Organo Consultativo (RVA) y
Controlaria General (AR) ta forma e Colegio Maximo di Estado (Hoge Colleges van
Staat). Nan ta e organonan independiente di gobierno. Gobierno ta consisti di
Gobernador y e Ministernan cu ta maneha nan cartera cu nan a ricibi.

Gobierno di Aruba ta percura pa entre otro legislacion, maneho y maneho financiero di
e pais. Loke ta importante pa nos generacion nobo cu ta bay voto e aña aki ta cu nan ta
consciente pa kico nan voto ta importante. Parlamento ta representa henter e pueblo
Arubano y ta e organo mas halto den e structura constitucional di Aruba. Na momento
cu bo ta bay deposita bo voto bo lo deposita e voto pa un parlamentario cu ta keda
scogi y eligi pa cuatro aña cu ta e periodo legislativo di Parlamento. E aña
parlamentario ta cuminsa ariba e di dos diamars di September semper y na unda cu lo
haci esaki den grandi unda cu gobernador lo ta presente y ta duna su discurso riba
e maneho cu gobierno a hiba durante e ultimo aña y e maneho cu gobierno lo hiba
durante e aña binidero. Pa loke ta trata gobierno tin separacion di poder den
gobernacion. Parlamento hunto cu Gobierno ta traha ley. Gobierno cu ta encera
Gobernador y conseho di minister ta ehecuta e leynan .

Prome Minister ta goberna nos pais y cada minister ta asumi encargo di un parti
specifico di gobernacion y asina e ta bira e politico responsabel pa su ministerio, tur
loke cu ta keda haci den cada cartera ta independiente y responsabel di e minister
encarga. Sinembargo cada ministerio tin mester di otro y e ministernan ta delibera cu
otro pa asina finalmente formula un maneho desea. Na Aruba e ministernan y
Gobernador ta forma e poder ehecutivo y Parlamento hunto cu gobierno ta forma
e poder legislativo. Aruba tin algun luna su dilanti pa scoge e partido desea y asina ta
scoge tambe e rumbo cu Aruba lo sigui pa nos tur tanto como adulto, nos grandi nan y
tambe nos futuro generacion. E realidad ta cu influencia dia pa dia ta hunga un rol
grandi sea den publicacion y intimidacion, pero na final ta keda loke abo como persona
mes kier pa bo Pais. Pesey mes ta importante informa bo mes bon, corda, analisa y
duna bo voto pa futuro di bo pais. VOTA CONSIENTE