Page 44 - AVP

ORANJESTAD (AAN): Diaranzon mainta Ministro di Enseñanza Rudy Lampe a acudi na
EPB Oranjestad na Hato pa asina scucha e preocupacion cu ta reina cerca docentenan.

Ministro Lampe a mustra cu EPB Oranjestad ta cay bao Stichting SEPB, y nan tin nan

directiva.

Sindicato SIMAR tambe tabata presente na e reunion aki entre Docentenan y
Ministro. Tin cambio cu SEPB kier haci na scol, como cu na Mei e directora actual a

laga sa cu e lo no ta director mas pa e aña escolar venidero.

SEPB a bin cu un cambio, y a bin cu director nobo pa EPB Oranjestad y tambe uno pa
EPB San Nicolas. Esey ta un cambio caba cu e docentenan tin di bay costumbra cune.

Sinembargo apenas 3 siman despues a bin cu un cambio mas, esta ora cu a avisa e
docentenan cu e managernan tambe lo bay wordo cambia di Unit. Fuera di esey a
informa cu nan lo bay ta haciendo cambio entre e docentenan existente tambe.

SIMAR a mustra cu esaki ta algo demasiado cambio den transcurso di 3 siman, y no a
tene cuenta cu e docentenan.

Docentenan a subraya cu nan no ta contra cambio, pues e ta algo bon. Sinembargo bo
tin di percura pa bo haci e cambio aki den un proceso di tempo, y no den un lapso di
apenas 3 siman.

Cu e reunion, Docentenan a mustra pa tene cuenta cu nan ora cu introduci cambio,
como cu nan ta esnan cu ta bay carga e cambio. Nan deseo grandi ta pa Directiva di
SEPB mes acudi na EPB Oranjestad pa asina docentenan por haya chens di puntra nan
e motibo pakico a introduci un cambio asina drastico. Pero te ainda no por haya

Directiva di SEPB pa bin scol.

Directiva a manda nan si un carta, y awor ta desea di haya un carta bek di e
docentenan cu nan puntonan riba papel. Pero docentenan ta insisti pa Directiva di

SEPB mes yega scol pa topa cu nan cara-cara. Duna nan e honor pa yega cerca e
docentenan.