Page 70 - MIN ARENDS

Durante un ceremonia oficial diaranson ultimo den presencia di Minister di Economia y
Comunicacion Richard Arends, Director di planificacion di ruta di JetBlue John
Checketts, CEO di Aruba Tourism Authority Ronella Tjin Asjoe-Croes, CEO di Aruba
Airport Authority James Fazio, y CEO di AHATA Jim Hepple, a yama bonbini na
JetBlue su vuelo inaugural cu servicio entre Fort Lauderdale-Hollywood International
Airport y Aruba su Aeropuerto Internacional Reina Beatrix. Cu buelonan diario entre sur
di Florida y Aruba, e ruta nobo lo sirbi como hub importante pa ricibi mas bishitante for
di e.o. e region Oeste di Merca, cual operacion a inicia dia 4 di januari, 2017.

Pa conmemora e vuelo inaugural aki, Aruba conhuntamente cu JetBlue a treat e
bishitantenan di e vuelo riba un dia yena cu festividad y regalonan, unda a decora e
punto di salida na Fort Lauderdale cu decoracionnan festivo di Aruba.

RUTA NOBO, OPORTUNIDADNAN NOBO.
For di dia 29 di augustus di 2016 benta di boletonan pa cu e ruta nobo aki a inicia.
Esaki ta e di tres ruta non-stop pa Aruba di JetBlue cu ta inspira confiansa, elevando e
cantidad y calidad di pasaheronan procedente di Merca. Mester delinea cu e
proximidad beneficioso entre Fort Lauderdale y Aruba, JetBlue awo por ofrece su
clientela un liñanan di producto inovativo y atractivo. Ehempel di esaki ta entre otro
‘Weekend Get-Aways’ y paketenan asina yama ‘Caribbean Escapes’.

“Aruba su partnership cu JetBlue lo continua na eleva nos turismo na nivelnan nobo. E
aerolinea aki su servicio diario di Fort Lauderdale, lo sirbi como hub importante pa ricibi
mas bishitante for di entre otro e region Oeste di Merca manera San Francisco y Los
Angeles, pero tambe di e parti Sur di Florida cu ta un area unda A.T.A. ta activando
mas”, segun Sra. Ronella Tjin Asjoe-Croes, CEO di Aruba Tourism Authority. El a sigui
elabora cu tin como meta pa logra un crecemento di 5% for di e mercado di Merca pa
aña 2017. E adicion di e hub di JetBlue aki ta cardinal pa por logra e crecemento aki y
A.T.A. kier sigura cu e aña ta cuminsa –y continua– na un manera fuerte, pa cual
motibo a inverti den promocion adicional durante lunanan di november y december
2016. Ademas, A.T.A. conhuntamente cu JetBlue a lansa un campaña promocional pa
asina sigui promove e ruta nobo di Fort Lauderdale durante 2017

RELACIONNAN SOLIDO CU RESULTADONAN POSITIVO
CEO di Aruba Tourism Authority, Ronella Tjin Asjoe- Croes a comenta: “E ultimo 10
añanan e relacion entre Aruba y e compania aereo JetBlue a sa di conoce un evolucion
positivo cu a contribui na un incremento di 12% di e mercado turistico Mericano durante
e period aki. JetBlue a trece entre 20% pa 25% di e total di bishitantenan for di Merca
pa Aruba durante e ultimo 5 añanan. Durante e prome diez lunanan di 2016, Aruba a
conoce un crecemento di 6.7% di pasaheronan procedente di Merca biahando cu e
aerolinea prestigioso aki.”

E di tercer ruta non-stop for di Merca pa Aruba di JetBlue ta proyecta pa contribui na un
crecemento di 9.7% di capacidad asiento aereo durante temporada halto (e prome 3
lunanan di 2017).