Page 7 - WEB

ORANJESTAD (AAN): Director di Serlimar,
Henley Davelaar a duna di conoce cu e ta contento cu na Pos Chiquito, nan por a habri
ayera diamars e parti di recepcion, caminda cu por ricibi clientenan eynan.

Nan “Help Desk” ta activo eynan cual ta inclui e servicio di recepcionista y telefonista
locual ta alivia e fluho di yamada cu ta drentando den e dianan aki y cu nan no tabata
full prepara pa atende.

Davelaar a indica cu awor Serlimar na Pos Chiquito ta prepara pa esey y e yamadanan
ta wordo atendi manera mester ta, cu e atencion corecto y tambe e parti di “help desk”
cu ta totalmente funcional.

El a sigui bisa cu banda di e introduccion di cobranza, nan tin otro proyectonan cu a
cuminza cana. El a menciona e parti di “recycle-hall” cual ta un proyecto den un lugar
halto den nan lista di prioridadnan.

Esaki ta bay ta funcional na fin di maart. Tur hende cu tabata pendiente pa hiba palo,
hero, glas, plastic esaki ta bay bira posibel den forma di ‘drive-thru’ na Pos Chiquito, a
bisa.

Henley Davelaar a agrega cu e manera cu esaki ta funciona ta cu e persona ta bay cu e
materialnan separa y Serlimar ta zorg pa esaki y e materialnan wordo recicla
corectamente.

E proceso pa deposita e materialnan lo bay na un manera controla y disciplina. Ta bay
tin hende tanto na entrada como na salida pa guia tur e proceso, a señala.