Page 102 - MIN ON

Victor Montagliani: A scoge Aruba pe congreso basa riba
trabounan haci di AVB

Sunday, 09 April 2017 22:32
Comparti

Den fin di siman a tuma luga e prome congreso di CONCACAF na Aruba, unda cu tanto Presidente di
CONCACAF
, Victor Montagliani y Presidente di FIFA, Gianni Infantino, tabata presente. Un total di 41 pais a bin
Aruba pa participa na e di 32 congreso di CONCACAF. Pa Montagliani, e experiencia di ta na Aruba
tabata unico y fantastico. Minister di Salud Publico, Cuido di nos Grandi y Deporte Alex Schwengle,
Arubaanse Voetbal Bond y e comunidad di Aruba a habri man pa ricibi tur e delegadonan cu a presenta
pe congreso di CONCACAF.
Pa Victor Montagliani, e escogencia di Aruba como destinacion pe congreso tabata masha facil, pasobra
durante su campaña pa Presidencia di CONCACAF, el a bishita Aruba y a mira e trabou cu Richard
Dijkhoff y su team di Arubaanse Voetbal Bond ta haciendo. Esey a pone cu el a dicidi di tene su prome
congreso como Presidente di CONCACAF, aki na Aruba. Nan no a desapunta e expectativa cu tabatin.
Victor Montagliani ta honra di a tene su prome congreso di CONCACAF aki na Aruba.
Delegadonan a participa den diferente tayer, reunion y atende cu preguntanan di diferente desaroyo.
Tambe durante e congreso a papia di e presupuesto, di detayenan y ta transparente pa tur hende mira.
"Mi ta orguyoso di e direccion cu nos ta bayendo", Montagliani a remarca.
Victor Montagliani, Presidente di CONCACAF ta haya cu bou guia di Richard Dijkhoff, Arubaanse
Voetbal Bond a haya un luga den e famia di CONCACAF y el a bira un lider den CONCACAF. Algun
trabou haci caba ta mustra kico nan kier logra, un di nan ta e beach soccer cu kier yega na nivel
internacional. "Mi ta kere bou guia di Richard, Aruba ta den bon man", asina Presidente di CONCACAF a
remarca. CONCACAF hunto cu FIFA a papia cu Gobierno riba e parti cu nan lo yuda sostene unda cu
por. "Nos portanan semper ta habri y esey lo sigui asina", Montagliani a remarca na final.
CONCACAF ta e organo gubernamental di continentenan Norte Americano, cu ta inclui Centro America y
region Caribense. Tres departamento di Guyana Frances, Nacionnan independiente di Guyana, Surinam
y Guyana Frances ta miembro di e Confederacion. E funcion primordial di CONCACAF ta organisa
competencianan pe team y clubnan nacional. Tambe nan ta organisa e torneonan clasificatorio di e Copa
Mundial masculino y femenino.
Victor Montagliani di 51 aña di edad ta un comerciante Canades, ehecutivo di futbol y Presidente di
CONCACAF y ta miembro di FIFA. A funda CONCACAF dia 18 di September 1961 na Mexico City unda
cu a uni NAFC y CCCF. Esey a bira e di 5 confederacion di continente bou di FIFA, cu entretanto a crece
na 6 continente afilia. E miembronan cu a fund'e ta Canada, Costa Rica, Cuba, El Salvador, Guatemala,
Haiti, Honduras, Mexico, Antias Hulandes (Corsou), Nicaragua, Panama, Surinam y Merca. CONCACAF
ta e di tres confederacion mas exitoso di FIFA. CONCACAF tin 41 miembro asocia; 27 di Caribe, 7 di
America Central, 4 di Noord America y 3 di Sur America.