Page 41 - MIN ON

Michelle Hooyboer–Winklaar: Preparacion den fase final pa
edificio nobo pa SPO Pariba

Monday, 13 February 2017 20:43
Comparti

Siman pasa Minister di Enseñansa, Michelle Hooyboer–Winklaar a reuni cu Directie Onderwijs, DOW
y Director di SPO Pariba, pa finalisa y duna e “green light” pa termina e documentonan necesario pa por
bay destaho publico pa e edificio nobo di SPO Pariba.

E scol actualmente ta situa na Savaneta. Antes e tabata resorta bou di SEPB, pero a independisa na aña
2012 y awor ta resorta bou di Dienst Publieke Scholen (DPS). Lo construi un edificio cu ta bira un scol
completamente nobo. Lo haci uzo di e edificio bieu di Task Force na Brazil (dilanti Centro di Bario
Brazil).

Ta trata aki di un scol di 2 piso, cu lo tin tur aspecto necesario pa brinda Enseñansa optimal. E lo conta
tambe cu su “green house” caminda e studiantenan lo siña con pa planta nos productonan local.

Ta premira cu lo keda cla pa fin di februari cu tur documento y asina aki por bay over na un destaho
publico pa fin di maart 2017.

E proyecto di SPO lo ta un edificio mas banda di varios proyecto di renobacion y construccion durante
e ultimo 3 añanan, incluyendo Colegio San Antonio, Colegio San Augustin, Colegio San Nicolas, Graf von
Zinzendorf Kleuterschool, Mon Plaisir Basis & Kleuter, y Arco Iris Kleuterschool y Rosa College y Prinses
Amalia Basis.

Banda di esaki nan tambe a renoba cura di diferente scol, manera Ayo Kleuterschool, Mon Plaisir Basis
& Kleuter, Colegio Felipe B. Tromp, Cacique Aterima, PIUS X School y SPO Sta. Cruz. Na tur a inverti un
total di mas cu 27 miyon florin den infrastructura escolar.