Page 54 - SOC JAN 24

Apesar cu por tin alarma y cacho, iluminacion semper ta
duna e ciudadano extra siguridad

Monday, 23 January 2017 17:50
Comparti

Habitantenan di bario Caya Ruby na Noord a keda hopi contento cu nan peticion pa luz a keda honra.
Caya Ruby ta keda den e area pariba di saliña.

Despues di a bishita e bario den oranan di mainta pa combersa cu e habitantenan riba nan peticionnan
pa iluminacion y asfalt di algun caya, den oranan di anochi e prome poste di luz a wordo cendi door di
Prome Minister Mike Eman. Tambe tabata presente Minister di Labor sr. Paul Croes. E programa Luz
den Bario ta algo cu a inicia bou Gobernacion di Gabinete Mike Eman I y mirando cu tabatin hopi
demanda pa iluminacion di caya, a sigui cu esaki den e di dos Gobernacion Eman. E mandatario a splica
cu den tur e biahanan cu nan ta pasa ta dos punto di preocupacion ta resalta bou di e habitantenan y
ambos tin di haber cu nan interes general: mas iluminacion y asfalta mas di e camindanan di santo.
“Cada un di e puntonan aki ta contribui na mehoracion di calidad di bida den e bario, ta trece un sentido
di siguridad y ta permiti e personanan pa disfruta un tiki mas di e ambiente pafo di nan cas den oranan
di anochi; muchanan por core nan bicicleta un poco mas laat. Pa nos unda cu nos por haci un diferencia
pa mehora e calidad di bida di nos hendenan, nos ta haci'e,” e mandatario a expresa. Minister Paul Croes
di su banda a expresa cu e accion di Prome Minister Eman ta admirabel, pasobra e no ta bishita barionan
ora di campaña so, pero tin 8 aña canando a base semanal den bario, manteniendo e contacto cu pueblo.
“Pa bo sinti loke e comunidad ta sinti bo mester ta cerca di e ciudadano; pa bo ta cerca di curason di e
ciudadano bo mester pasa den e bario y mira pa bo mes kico ta nan necesidad,” e mandatario a expresa.
E ciudadano Neyeilany de Cuba, bibando den Caya Ruby, a expresa di ta hopi contento cu iluminacion a
yega den nan caya. `E iluminacion di caya tabata hopi necesario pasobra aki tabata hopi scur y e ta duna
nos un sentido di siguridad awor cu tin luz,”” el a bisa. Tambe cu apesar cu e tin alarma y siguridad, toch
luz ta necesario. Nan mes tabata trata di yuda otro formando “neighbourhood watch” y nan tin un
chatgroup di habitante pa manda alerta ora ta necesario. Ciudadano van Vugt di e area a expresa di ta
hopi contento cu e trabou cu Gobierno ta haciendo den e barionan, principalmente pa duna e
ciudadanonan mas siguridad den nan bida diario. E proyecto di Luz den Bario ta posibel door di
cooperacion di Minister de Meza y e empresa estatal Utilities NV, pero tambe departamentonan di
Minister di Infrastructura Benny Sevinger. Habitantenan contento a organisa un celebracion pa e hecho
aki na cas di sra. Marisella Trimon.