Page 65 - SOC JAN 24

Dialogando cu chauffeurnan di Truck den accion Minister
Bermudez a sigura cu SIAD ta na altura cu por duna areglo di

pago pa number di auto

Monday, 23 January 2017 17:42
Comparti

Minister di Finanza y Organisacion Gubernamental Angel Bermudez no tabatin ningun problema pa
baha trapi y combersa cu chauffeurnan di truck riba nan preocupacion pa loke ta pago di belasting di
auto cu a wordo cambia pa wordo paga den dos termino.

Chauffeurnan di Truck di sector di transporte (carga) den oranan di mainta a tene un accion yegando
Bestuurskantoor cu un cantidad di trekker y otro tipo di truck blokeando caminda, pitando duro y
exigiendo pa papia cu Minister Angel Bermudez. Nan kier a entrega un Manifesto na e titular di Finanza,
kende no tabatin ningun problema pa baha pa topa cu e grupo cu a expresa nan preocupacion
specialmente riba e punto cu number di auto mester wordo paga den dos termino pa loke ta nan sector. E
situacion dificil cu nan sector, segun nan, ta pasando aden ta haci e cambio den e forma di pago un poco
dificil pa e empresanan chikito aki. E grupo a expresa cu ta dia 22 di december nan a bin tende cu e pago
di belasting di auto mester wordo paga den dos quota, enbes di 4, manera nan tabata custumbra cune.
“Esaki ta inaceptabel pasobra nos no a prepara nos mes financieramente pa esaki,” bosero di e grupo, sr.
Faro, a expresa na e mandatario. Pero a splica tambe cu nan ta empresanan chikito y cu nan ta depende
di nan clientenan cu tambe ta pasa den retonan. Nan ta kere cu den 2018 si nan lo por cumpli cu e
sistema nobo di pago. Minister Bermudez a splica e grupo cu sigur e tin comprension pa e situacion di e
sector di transporte.

El a splica cu e mes a bin tende den un fase laat di e cambionan. Ya el a duna instruccion na
Departamento di Servicio di Impuesto pa ta tolerante cu e personanan cu indica cu nan no por logra e
pago den dos quota. “Mi ta considera e aña’ki como un aña transitorio pa tur esnan envolvi. Mi no tin
problema pa ta flexibel. Servicio di Impuesto ta flexibel y por yega na un areglo di pago cu tur e
personanan cu pidi pa esaki. Pa loke ta e keho di e chauffeurnan riba estado di camindanan, Minister
Bermudez a splica nan cu na final di aña pasa, den e presupuesto supletorio, a pone un suma adicional di
5 miyon florin pa reparacion di camindanan cu a sufri hopi daño a causa di e yobidanan fuerte di ultimo
tempo.