Page 51 - MIN ON

Fundacion Autismo lo educa con anda cu studiante autista

Wednesday, 22 February 2017 17:36
Comparti

Despues di a reuni cu miembronan di directiva di Fundacion Autismo Aruba, Minister di Educacion,
Michelle Hooyboer-Winklaar a expresa su satisfaccion riba e avancenan di presentacion di un tayer dirigi
na educadornan riba autismo y e comportacion cu ta bin cune.

“Ta asina cu pa varios tempo caba nos ta trahando cu Fundacion Autismo Aruba riba un proyecto cu lo
trece informacion cerca maestronan di scol, hoofdnan di scol y obviamente na mas educadornan cu tin
mester e tipo di informacion cu por yuda nan con pa anda cu studiantenan cu tin autismo,” e Minister a
splica. E mandatario a sigui bisa cu autismo ta un desorden cu un spectrum… “loke kiermen cu tin un
variacion hopi grandi riba e tipo di autismo cu ta existi of e complicidad di e autismo cu tin aspectonan
unico cune. Esaki ta trece cune cu mas informacion nifica miho aplicacion pa nos maestronan cu lo por
yuda un studiante cu tin autismo den su klas.” “No ta solamente esunnan cu ta bayendo enseñansa
special sino tambe ta algo cu ta existi den nos sistema di educacion regular. Nos ta wak cu e informacion
ta hopi necesario pa esunnan cu ta traha den frontera di educacion, o sea, e klas,” Minister Hooyboer-
Winklaar a amplia. E ta sigui splica cu aña pasa a cuminsa cu un tayer cu a tuma luga den oranan di
anochi na Biblioteca Nacional unda a invita maestronan.

“Aki nan a haya un bista di kico ta exactamente y informacion hopi valioso pa nan. Nan a keda hopi
impresiona y a pidi pa mas,” e ta agrega. Segun e mandatario esaki semper tabata e intencion pa haci’e
na un manera hopi structura pa tur e scolnan basico, kleuter, scolnan special, pero tambe tra’i merdia y
esunnan cu ta traha den centronan di ‘voorschoolse opvang.’ “Nos a delibera cu nan pa haci esaki na un
manera hopi mas profundo cu un tayer y sesionnan special. Nan tabata di bishita awe pa nos por finalisa
esaki y pa tin bista riba fechanan y a concorda cu ta bay ta mas o menos final di april pa comienso di mei
di e aña aki,” Minister Hooyboer-Winklaar ta elabora. El a sigui bisa cu su ministerio ta mira e necesidad
y importancia di e tayer aki… “pasobra con cu bay bin nos tin e obligacion pa sigura cu nos studiantenan,
a pesar di cualkier tipo di condicion manera den e caso aki autismo, tin e oportunidad pa por siña di un
forma cu nos por brinda pa nan. Esaki ta algo cu nos ta wak su importancia. Nos educadornan lo sa
exactamente kico nan lo por haci pa por yega nan e muchanan aki y haci’e un poco mas facil pa siña nan.
Asina nan lo yuda desaroya e mucha completo y esey ta e meta di e tayer aki,” Minister Michelle
Hooyboer-Winklaar ta declara.