Page 63 - MIN JUS

A bay cu doñonan y trahadonan ilegal di Cilo

Saturday, 10 December 2016 20:54
Comparti

E establecimento Cilo City Lounge ta cera desde diabierna, pasobra e doñonan ta cera y mescos 2 otro
trahado ilegal, tur procedente for di Venezuela.

Ta algun luna pasa cu un grupo Venezolano a tuma e operacion over for di e doñonan di Belgica, pero ta
obvio cu desde e cambio problemanan a presenta. A purba opera sin permiso, locual awor ta percurando
pa basta complicacion pa e compania.

E compania cu ta maneha e restaurant, Havenkant Horeca N.V. ta existi desde Februari 2009 caba, e
tempo ey bou maneho di e mesun doñonan cu Taste of Belgium na Palm Beach Plaza. Cu tempo nan a
dicidi di bende y e grupo aki, di dos Venezolano a tuma e operacion over.

Diabierna Warda nos Costa a presenta pa un control y a haya no menos cu 4 persona trahando pa cual a
pidi pa nan permiso di estadia y di trabou. Ningun por a mustra tal, pa cual a detene nan tur y hiba cera
pendiente nan deportacion. Solamente un di nan a prueba cu e ta cu vakantie pero a pidi y a haya un
prolongacion te cu 3 luna. Como cu a gar'e ta traha den su "vakantie" a lag'e bay y oblig'e pa bandona nos
isla mas pronto posibel. E tres otronan, den cual e dos socionan doño di e restaurant a keda encarcela
pendiente nan deportacion bek pa Venezuela.

Minister di Husticia, mr. Drs. Arthur Dowers a duna di conoce cu ley ta conta pa tur hende. Mescos cu
empleadonan mester regla nan permiso di trabou y di estadia, doñonan di negoshi tambe mester haci tal.
Den caso cu no cumpli, ta sosode e tipo di casonan asina, unda e compania ta keda sin maneho awor.