Page 70 - MIN JUS

Tur indicacion ta cu Stevie mes a planea atraco fatal riba su
famia

Saturday, 10 December 2016 18:45
Comparti

Dia 13 di December ta haci tres luna cu a sosode un atraco fatal na Wayaca.

Den e caso aki cu a sosode 13 di September 2016 tin dos sospechoso deteni. Ambos ta envolvi full den e
caso aki. Stevie ta e chines cu tambe ta deteni y tabata tin e rol mas importante den e caso cu a costa bida
di su mesun tanta. El a planea henter un atraco cual e Boneriano Jefferson "Jeff" Echobardo di 27 aña di
edad a los e tiro fatal riba e dama chines y herida e casa den nan cas. Con tur cos a cuminsa. Parce e
situacion di e compania di Ice di Stevie no ta bayendo 100%. Tin ekiponan cu ta daña y mester di placa
pa inverti. Parce te hasta ta cumpra ijs cerca otro compania pa asina por a deliver esaki na su
clientenan. A base di esey mes e necesidad di placa tabata tey pa por inverti den mehoracion di Stevie Ice.
A bin cu e idea di comete un atraco. Stevie su plan tabata bon hinca den otro pero e resultado tabata
fatal. El a logra convence e Boneriano cual e conoce hopi tempo pa comete un atraco. A bay asina leu pa
huur of fia un auto cerca un Ex Polis. Cu e auto di e Ex Polis a core henter e ruta den Wayaca pa asina
mustra Jeff e atracador unda e mester atraca. Stevie sa cu na cas di su tanta tin un caha fuerte. Esey
tabata e target di e atraco. Despues di prepara e plan cu anticipacion y mustrando e atracador e area, a
bay over na comete e atraco. Stevie mes a zorg pa busca e arma pa asina nan tin esaki pa e atraco. Riba e
merdia di 13 di September ta Stevie mes a bay bek baha Jeff den cercania y asina el a bay na e cas pa
comete e atraco. Den e proceso cos a bay robez y aki tiro a cay contra e tanta grandi di Stevie mes. E tiro
tabata fatal. Despues Jeff cu a bira e atracador asesino a logra huy cu e auto di e tanta di Stevie mes. A
bay te na Santa Cruz caminda eynan atrobe Stevie a bay busca Jeff. Aunke e ta bisa di no tabata sa di
nada na prome instante, tog henter e storia aki tabata uno falso. E tabata e brain pa tur e atraco cu a
resulta fatal. Prome cu su detencion tabata tin un trabou hopi intensivo di parti di e team investigativo.
Hasta na e funeraria tabata tin miembronan di recherche presente ora cu Stevie tambe tabata tey pa
condolencia. Djey a bay over na su detencion na cas den Pavia despues di e orario di condolencia. E
envolvimento di Stevie tabata hopi pisa prome y despues di e atraco fatal. El a bay busca e asesino na
Santa Cruz despues di e cas, despues a hibe cas y tambe a buske bolbe hibe kima e pañanan te banda di
Palo Marga. Bayendo Palo Marga a pasa Botica cumpra material pa e herida cu e asesino tabata tin ora el
a corta su man na e glas di porta durante atraco na e cas. Analizando su rol di comienso te final ta duna
indicacion cu e castigo cu Stevie lo haya lo ta uno sea similar of mas pisa cu Jeff mes. Lo falta poco pa e
caso aki bin pa wordo trata den corte. Sigur un caso cu hopi hende tin atencion pe y pa wak ki castigo lo
wordo pidi.