Page 15 - MIN ON

Drs. Arthur Dowers: Accion contra invasion di adicto y
sushedad ta sigui

Sunday, 04 December 2016 17:41
Comparti

Locual cu ta tumando luga na algun scol y cierto edificionan cu ta cera pa motibo di proceso di
renobacion, unda cu adictonan ta pretende di “tuma over”
e propiedadnan, ta mas cu un problema y un asunto cu mester di un acercamento multi disciplinario. E
prome accion uzando un acercamento multi displinario contra e invasion di propiedadnan pa adictonan
a tuma luga recientemente na e edificio di Colegio Frère Bonifacius.
Minister di Husticia y Asuntonan di Adiccion, mr. Drs. Arthur Dowers ta splica cu for di e edificionan a
saca diferente adicto y e tabata satisfecho pa mira cu algun di e personanan a acepta pa drenta un ciclo di
tratamento buscando pa cura di nan adiccion. E accionnan ta sigui na e otro scolnan y ta percura pa no
solamente saca e adictonan for di e propiedadnan, pero tambe pa haci e luganan limpi y cera nan bek,
Minister Dowers ta laga sa.
Entretanto lo tin un evaluacion tocante di e acercamento di adictonan cu ta riba caya, el a agrega. E
mandatario a remarca cu a busca un lista di tur adicto y lo ta moviendo cu e un grupo basta grandi, multi
disciplinario, caminda lo atende cu cada persona y na prome luga lo ofrece cuido y tratamento.
Minister Dowers a subraya cu den e situacion cu un adicto no ta acepta cuido ta haci bon cla na dje cu e
no por sigui haci loke e ta haciendo, causando daño na comunidad, pasobra si un persona kier ta liber
den nos comunidad e mester comporta su mes.
E adicto cu kier ta liber no por ta causando problema pa husticia y si e scoge pa keda molestia, keda
comete actonan impugna cu leynan, husticia lo bay atende cune, el a bisa. Si acaso e persona no acepta
yudansa y sigui ta un molester y/of peliger pa comunidad, husticia lo tuma paso y percura pa e haya
tratamento obligatoriamente. E scolnan pendiente di nan renobacion lo wordo haci limpi, y cera pa asina
proteha e propiedadnan aki cu ta di Gobierno of un of otro fundacion.
Lo bay atende tambe cu sushedad causa pa e adictonan mes y tambe cu e negoshi of individuonan cu ta
paga e adicto un par di florin pa tira nan sushi di negoshi of cas afo, pasobra e sushi aki ta “end up” den
hopi caso no den un container of bari, pero riba caya of den un propiedad bandona of bashi.
Tin adictonan cu a expresa durante di e accion na Colegio Frère Bonifacius cu si saca nan for di e edificio
nan ta bay otro caminda y kibra drenta bay biba ilegalmente den otro edificionan. Consecuentemente,
Minister Dowers a manda un señal fuerte pa e adictonan na cuminsamento di e accionnan aki.
Primeramente ta ofrece nan un man pa nan bira miho, y integra den comunidad, ta duna nan un chens
pa busca un miho futuro. Pero tambe, cu si acaso nan sigui cu nan cu nan mal comportacion y molester
husticia lo haya nan mes forsa pa atende cu nan uzando leynan existente pa pone nan bao di tratamento
obligatorio.