Page 22 - MIN ON

Minister Arthur Dowers ta apoya mas intercambio entre
huristanan

Sunday, 04 December 2016 17:37
Comparti

Recientemente a tuma luga e di dos “Juristenmiddag” (atardi pa huristanan) den aula di Universidad di
Aruba.
Ta trata aki di un encuentro pa huristanan local organisa cu e meta di hiba dialogo riba un tema di
interes comun. E tema pa e sesion di diabierna ultimo tabata “Tin deseo pa un revision di e
constitucion?”
Minister di Husticia, mr. Drs. Arthur Dowers a efectua apertura di e sesion. El a expresa su deseo pa cu e
continuidad di e evento aki, pero tambe cu lo por bin mas sesion pa aña. Entre otro el a menciona e tema
“peso/largura di strafnan”, esta si strafnan mester ta mas largo of mas cortico, si mester haci cambionan
den e leynan y ki cambionan lo mester haci. E huristanan ta pensa cu e cambio di largura di strafnan lo
por tin un influencia positivo riba e nivel di criminalidad na Aruba, o sea lo por reduci criminalidad?
E mandatario a expresa cu tempo cu e tabata encarga cu e cartera di enseñansa, e tabata preocupa pa e
hecho cu no tin suficiente debate social tocante loke ta tuma luga riba tereno huridico den e comunidad.
P’esey mes, e di prome, y awo e di dos Juristenmiddag ta conta cu su entusiasmo, apoyo y sosten pa cu su
continuidad y ampliacion di discusion y topiconan. El a bisa cu e ta spera di mira den medionan di
informacion riba e contenido di e presentacion y discusionnan cu a tuma luga pa motiva e combersacion
comunitario.
Minister Dowers a gradici Universidad di Aruba y George Croes pa e iniciativa. El a comenta cu e topico
cu a scoge pa e encuentro e biaha aki tin diferente angulo y e punto di bista ta cambia sigur dependiendo
kende ta envolvi.
Minister Dowers a desea tur esunnan presente un atardi fructifero y a enfatisa cu e lo kier mira pa aña
diferente sesion di Juristenmiddag y cu mas informacion riba temanan relevante ta wordo comparti cu
comunidad. Esaki sigur ta yuda tambe inicia e discusion den comunidad basa riba temanan huridico di
interes general.