Page 50 - MIN ARENDS

Presidente di Parlamento: Tanten tin abuso sexual di mucha
na Aruba e asunto aki lo keda prioridad di Parlamento

Thursday, 23 February 2017 00:58
Comparti

Den entrevista cu presidente di Parlamento, drs. Mervin Wyatt-Ras, el a trese padilanti cu abuso sexual
di menor sigur tin atencion di Parlamento. Esaki tanten tin abuso di mucha na Aruba. No solamente
leynan di inciativa pa cambio di nos Codigo Penal pa loke ta trata delitonan moral a ser aproba dor di
Parlamento.

Tambe a cambia e Codigo Penal un biaha mas pa modernis’e. Aki e.o. castigonan a bira mas halto y a
introduci boet. A aproba diferente mocion y amienda pa mehora funcionamento di e.o. Buro Sostenemi.
A trese cambio den Codigo Civil dunando e buro aki mas autoridad. Alavez Parlamento a aproba dos
rapport cu recomendacionnan pa gobierno, esta na anja 2010 y anja pasa na juni 2016. Sinembargo
ciudadanonan no ta contento cu e cantidad di castigo cu ta duna e malhechor en comparacion cu e danjo
irreparable cu abuso ta causa serca e victima. Aki ta unda na varios ocasion a discuti den Parlamento.
Den e comision parlamentario encarga cu Justicia, presidi pa Parlamentario mr. Desiree de
Souza_Croes, a intercambia diaranzon cu minister di Justicia Dowers, hunto cu representante di
Ministerio Publico, encuanto e castigonan y kico pa haci pa preveni cu abuso ta tuma lugar. Aki a
enfastisa cu e castigonan cu ta ser duna ta abou. Ademas a puntra efecto di castigonan minimo.
Parlamentario Croes a haci diferente pregunta na minister y ta puntra si por haci uzo di “Richtlijnen” di
Union Europeo pa nos situacion Arubiano. Wyatt-Ras ta senjala cu e consecuencianan di abuso sexual ta
devastador pa bida di e menor, su famia, na skol, bario y pa comunidad. E victima ta desaroya e.o. miedo,
rabia, berguenza, odio, auto-estima abou cu consecuencianan mas aleu manera problemanan
psychologico, psychiatrico, maluzo di droga/alcohol, problema cu relacion y hasta prostitucion y suicidio.
E ta senjala cu te ainda nos no tin suficiente ayudo pa e famia y tambe e abusador pa e por rehabilita
pesey mes si duna e abusador castigo abou e chens ta grandi di repiticion.

Presidente di Parlamento ta lamenta si cu ora ta trata e tema importante aki, aunke den comision,
miembronan di oposicion no ta haci uzo di e oportunidad pa acudi pa nan cuestiona minister. Wyatt-Ras
ta di opinion cu abuso di mucha mester ta los for di politikeria. Si di berdad un parlamentario kier
cuestiona un minister e mester bin Parlamento den e reunion pa e cuestion’e. Wyatt-Ras ta contesta un
pregunta haci na dje y ta trese padilanti tocante di un reunion publico pidi dor di oposicion cu ta trata
criminalidad cu ya caba dia 6 di oktober el a trata un peticion di fraccion di Mep pa papia di
criminialidad y na e reunion aki e atendencia tabata abou. Wyatt-Ras no ta compronde dicon ta pidi
reunion y ora yam’e miembronan di e fraccion cu ta pidi reunion no ta show up. Aki no tin seriedad di
parti di e fraccion ey. Por lo pronto e asunto di abuso di mucha lo keda ariba agenda di Parlamento.
Wyatt-Ras ta di opinion cu tin cu enfatisa mas e parti di prevencion unda cu ta conta cu mihor preveni cu
lamenta. Si castigonan ta halto esaki por tin su efecto tambe riba e abusador cu lo pensa 2 biaha promer
cu comete fechoria cu un menor.