Page 36 - HOH

John Hodgson di SOGA: “E hospital cu Aruba ta bay haya ta
tremendo”

Thursday, 20 April 2017 17:39
Comparti

President di Stichting Onroerend Goed Aruba (SOGA) tabata hopi anima cu un sonrisa riba su cara pa e
orguyo di por a mustra na Minister President Mike Eman e siman aki, e avance grandi cu a alcansa den
construccion di e di dos edificio nobo di e expansion di Dr. Horacio Oduber Hospital.

SOGA ta e fondo cu, hunto cu Aruba Investment Bank (AIB), ta percura pa e recursonan financiero pa e
proyecto. Hunto cu arkitecto, companianan di construccion y Minister di Salud Publico, dr. Alex
Schwengle, a bin ta reuni semanalmente for di inicio di e proyecto, pero awo a haya oportunidad di
mustra e resultado na Premier Eman, como tambe titular di Infrastructura, Benny Sevinger. Hodgson ta
gradici e bishita di e Ministernan y ta splica cu tin diferente cos cu ta wordo papia riba caya den un tono
negativo tocante e proyecto, “pero bo tin di bin wak pa sa con grandi y con bunita e proyecto ta.” Pa
mustra pueblo tur esaki, ta bay organisa actividadnan di ‘Open House’ pa profesionalnan di sector
medico y principalmente, e propio pueblo di Aruba. “Ta un reto pa nos pa conkista e proyecto. Durante e
trayectoria diferente cos a surgi y asina e ‘scope’ di trabou a wordo amplia y dor di esey ta tuma mas
tempo pa cab’e. Hopi hende ta pensa cu e proyecto ta tardando, pero esey no ta e caso, ta djis cu tin mas
cos pa haci y ta imposibel pa haci tur den e tempo cu a planea originalmente,” Hodgson a splica.

Tambe e president di SOGA a papia di e salanan di operacion y Intensive Care Unit (ICU) cu despues di
un inspeccion haci, mester a adapta pa cumpli cu standardnan internacional nobo. A splica cu dor di
sinta na mesa y papia, a logra yega na e solucionnan necesario añadiendo tur loke ta necesario na e
proyecto. “Nos intencion, y ta un reto hopi grandi, ta pa cuminsa muda pashent pa e edificio di ‘Bed
Tower’ nobo entre mei y augustus proximo,” el a indica. Hodgson ta gradici pa e bon relacion y
comunicacion cu Minister y Gobierno, AIB como un partner grandi cu ta coopera y sa unda pa busca e
placa pa financia y tambe na e contratista OHL cu a surpasa tur contratiempo mescos cu e arkitecto cu ta
busca solucion pa e diferente issue cu por tin. Na final y segun e President di SOGA, “si bo wak despues
di tur cos e producto cu Aruba ta bay haya ta tremendo. Pa mi e no ta 5 strea, pero 6 strea pasobra nos a
introduci un strea mas.”