Page 36 - JUS DEC 8

Parlamento a trata presupuesto di DOW

Wednesday, 07 December 2016 20:34
Comparti

Marlon Croes, director di DOW tabata den Parlamento pa tratamento di presupuesto di DOW. El a conta
con a bay, unda mas ta capta atencion y loke mas ta pisa riba nan post.

El a splica cu esaki a bay den bon ambiente den Parlamento. Loke ta e punto mas fastioso cu tin den nan
presupuesto ta e limitacion di sumanan cu tin disponibel pa por mantene caminda y un di e puntonan cu
ta sali awor aki ta, cu Parlamento y minister di finansas y di infrastructura, ta trahando riba un fondo pa
drecha careteranan cu a sufri daño, despues di e awasero cu a tuma luga dia 20 di November ultimo. Ta
trata tambe di edificionan, cu lo bay ta hayando un suma pa por traha cun’e ainda y haci e
compromisonan pa e trabao cuminsa e aña aki ainda of den transcurso di otro aña. Ta e reto mas grandi
cu DOW tin te awor aki.

Fondo

Ta papia aki di un suma di 3.3 y maximo 4.5 miyon. E daño riba e red di caretera ta core den 4.5 miyon
florins, segun Marlon Croes.

E ta sigui splica cu semper ora cu traha cu presupuesto ta pone un reserva na comienso di aña di loke e
suma cu tin. Ta pone un banda. Ta papia di 10 pa 15% y e otro ta reparti’e cu ta bay ta uzando esaki
mensualmente. Cada luna ta wak con hopi a uza, con leu ta for di e financieel begroting, pa no keda den
un under commitment of un over commitment. Pa keda den e liña di e presupuesto cu haya aproba.

Con ta spaar
Croes a splica cu ta depende con grandi e proyecto ta y con compleho e ta tambe pa loke ta trata di
spaarmento. Si nos papia di plateau’s, e ekipo di DOW ta hopi bon pa traha cu plateau den un anochi,
cual ta mustra por maneha e gastonan hopi mas miho. Si kies un proyecto cu ta mas compleho, y mas
grandi, cu un cierto suma, esey ta nifica cu si mester bay haci’e, e por bay demora mas hopi cu ta causa cu
gastamento di placa ta subi of ta causa mas molester den nos comunidad. Ta prefera pa tene un destaho
publico y laga un contratista haci’e, cu tin mas capacidad y experticio compara cu DOW. Cada materia,
cada proyecto ta evalua su pro’s y con’s, kico e propio capacidadnan ta, kico por haci of no. A base di esey
ta traha un business case y conseha Gobierno kico pa haci.

E fondonan cu DOW tin ta uz’e mayoria biaha pa mantencion di infrastructura. Pa loke ta proyectonan
cu ta regarda inersion, ta uza fondonan cu FDA ta pone disponibel, minister mes tin disponibel of e otro
ministerionan cu tin disponibel, of por ehempel ta trahando mas cerca den un partnership cu ATA,
caminda cu nan ta pone fondonan disponibel pa realisa proyecto y DOW ta prepara pa e proyecto wordo
ehecuta