Page 55 - MIN VOS

Otmar Oduber a busca Andin Bikker pa reforsa su
plataforma politico

Wednesday, 30 November 2016 20:22
Comparti

Parlamentario mr. Andin Bikker a confirma awe mainta cu el a reuni cu Otmar Oduber y cu ayera
Partijraad di Partido Democracia Real a dun'e autorisacion pa yega na un acuerdo

pa presenta un lista uni den e siguiente eleccion Parlamentario na september otro aña. Te ainda no a
dicici cua di dos politico lo bira lider, pero te awor ta papia di un liderazgo comparti.

Den pasado e tipo di plataformanan asina tabata conoci caba, por ehempel tempo di UNA-PIA-PRO. E ta
e formula pa diferente partido chikito uni na otro pa forma un frente mas grandi, cu mas voto y pa logra
obhetivonan y metanan comun. Na final, den politica, ta mas voto ta conta!

Sinembargo, desde aña 2001 caba e comunidad votado di Aruba a cambia e tradicion, en bes di vota pa
partidonan chikito pa ta yabi di gobernacion, a opta pa sostene partidonan grandi cu un mandato
completo. Asina MEP a gana eleccion cu 12 asiento, pa prome bes den historia di pais Aruba despues di
aña 1986. Desde e eleccion ey, tur otro sea MEP of AVP a gana cu mayoria di e asientonan.

E historia di Andin Bikker mes den partido PDR ta bisa cu su votonan individual den eleccion di aña
2005 a yega 1252 voto, mientras cu na aña 2009 el a subi te na 1621 mientras cu den e ultimo eleccion
Parlamentario na aña 2013 a hiba e lider di PDR te na 3047 voto, casi dobel di e resultado di 4 aña
prome.

Otmar Oduber a participa den eleccion Parlamentario cu partido AVP pa prome bes na aña 1997, tempo
ey el a haya 555 voto den su salida. Den eleccion na aña 2001, el a cay den voto te na 313 voto, pero a subi
atrobe na 2005 te cu 918 voto pa despues sigui crece den eleccion na 2009 pa 1647 voto y den e ultimo
eleccion a kibra tur record di crecemento y a yega 4008 voto y a bira e di dos votegetter di nos pais.

Sinembargo, ta dificil pa conta solamente votonan individual como e unico indicador di cuanto voto lo
por haya e siguiente eleccion comokiera cu historia politico na Aruba a mustra cu ora politiconan a
cambia di partido, manera a sosode cu Marisol Lopez y Booshi Wever por ehempel, cu nan a cay den
voto.

Di otro banda no a menciona ningun nomber ainda pa e plataforma aki, pero den gangnan ta scuchando
varios nomber procedente di abogacia, ex Parlamentaria di AVP, for di directiva di Camara di Comercio,
for di Directie Scheepvaart y incluso for di otro instancianan di Gobierno. Cu si e hendenan na final lo
subi lista no ta bon conoci. Falta hopi ainda pa eleccion, pa por sa kendenan tur lo afilia na e plataforma