Page 5 - ATA 17 MAY 2017

Ralph Maduro: Nan a "hack" mi Facebook

Wednesday, 17 May 2017 11:51
Comparti

E "strooman" cu ta maneha varios compania pa otro hende, Ralph Maduro, awe a bay na e radio di famia
Cano, unda e ta traha, pa desmenti y distancia su mes for di e publicacionnan cu a sali riba su pagina di
Facebook. El a bisa na Power FM awe cu di ayera nochi su Facebook ta comprometi y awe mainta a sali
un potret di dje den un scenario sexual, cu el a confirma di ta "fake".

Ralph Maduro a bisa cu e ta sospecha cu e publicacionnan aki ta sali despues cu ayera su amigo y socio,
Otmar Oduber, a publica supuesto pruebanan di traspaso di terenonan y cu esey lo a pone cu mesora a
cuminsa un atake cibernetico contra dje. Su mensahe na opositornan ta pa bin cu prueba contundente y
no e-mailnan falsifica. Probablemente henter e "stunt" di bisa cu a "hack" e cuenta di Facebook ta bin
despues cu a publica un supuesto e-mail entre Minister Presidente Mike Eman y e strooman Ralph
Maduro. Ta obvio cu e contenido no ta serio, ta bou nivel y ta falsifica. Pero como cu e "wega" aki por sali
e persona su tras caro y cu Siguridad Nacional a cuminsa un investigacion, mesora a sali anuncia cu a
"hack" su Facebook pa asina distancia di cualkier repercusion, mara na e acto di cobarde ey. Hecho ta cu
ayera na Canal 90 a anuncia cu tin pruebanan palpabel riba enrikisimento cu placa di pueblo of placa di
ATA dor di e ex Minister y entre otro su strooman. Ta papia di sumanan grandi di placa cu
organisadonan di evento mester traspasa pa companianan of fundacionnan di cual e ex mandatario y/of
su strooman tin control riba dje. No obstante cu ta hibando un lucha campal pa saca e pruebanan den
prensa, nos a compronde cu e pruebanan a bay caba na unda nan mester bay.