Page 2 - MIN JUS

Animalnan Exotico gara di contrabanda den boto nunca mas
a wordo manda bek Venezuela

Saturday, 27 May 2017 23:29
Comparti

Ainda por corda con riba un 23 di October 2016 durante un control di Kustwacht a intercepta un embarcacion di
Aruba cu cargamento grandi di animal. Tabata tin animalnan exotico y tambe otro animalnan cu no mag di drenta
Aruba sin permiso. Cu otro palabra tin prohibicion pa e animalnan drenta nos isla pasobra nan ta wordo protehi pa
Cites.

Despues cu a gara e descubri e animalnan aki a bin henter un discusion caminda tabata evalua si lo pone nan drumi
of lo mandanan bek etc. E animalnan tabata cuater Lora, varios Tucan di cual awe ta dos so a keda bibo, seis
Morocoy, un Ocelot, un Jaguarundi, varios cacho di cual uno tambe a muri y dos macaco. Ministerio Publico di
Aruba a notifica un media algo mas cu un siman pasa cu e bestianan aki tur a wordo saca bek for di Aruba. E noticia
aki no ta corecto. Nos tin confirmacion cu solamente e cachonan cu a keda na bida a wordo saca for di Aruba. Nan no
a bay Venezuela bek tampoco pero a wordo manda Merca. Un instancia special social a haya e cachonan aki y ta
usanan pa cierto actividadnan cu nan ta representa. Mientrastanto a keda e otro animalnan entre otro esnan Exotico
cu ta na diferente adres. Awor parce a tende cu ta atendiendo cu consulado di Venezuela unda nan lo kier e
animalnan bek y mandanan Venezuela. E pregunta cu a keda ta kende lo paga e recibonan di nan estadia? E recibo di
cuminda etc tur e lunanan cu nan ta aki. E reaccion tabata cu na Venezuela no tin cuminda ni pa hende y awor kier
bay cu e animalnan bek cu tur chens cu nan lo muri. Nan tin 7 luna caba na Aruba y biaha pasa Salubridad Publico a
laga sa cu ta cuater luna nan lo keda y djey lo mandanan bek. Awor cu a tende cu Ministerio Publico a bisa cu tur a
wordo manda caba, a investiga y ta resulta cu e storia di Ministerio Publico no ta berdad. Solamente e cachonan no
tey mas. Mientrastanto e animalnan tin un hogar na Aruba y ta den bon mannan. Investigacion cu a wordo haci ta
bisa tambe cu e ley ta duna espacio pa e demas bestianan keda Aruba. Ta solamente e cachonan so mester a bay. Ta
importante pa tende di Salubridad Publico of Ministerio Publico e berdad tras di e animalnan aki. Biaha pasa ta
masha cos Salubridad Publico a haci pa purba tapa of crea un cos rond di e animalnan. Awor tur e dos instancianan
aki a kere cu media a lubida. Un prome cu a bay busca e informacion a haya un noticia cu no ta berdad. Pesey ta
importante pa trece e noticia berdad den e caso aki y cu por confirma cu practicamente tur e animalnan ta na Aruba
cu excepcion di e cachonan cu a wordo manda Merca y no Venezuela. Un otro problema ta e multa cu tambe
Ministerio Publico a sconde. Mientras tabata busca informacion riba e suma cu a cay pa e contrabanda aki, te awe a
sconde y no a ni sikiera confirma si multa a cay. Ta cosnan masha straño cu scondemento tin tras di e contrabanda di
e animalnan aki. Kizas awe ainda por haya un aclareacion tanto riba e animalnan y e multa of sancion cu a wordo
duna pa e caso contra ley aki.