Page 3 - DESPA

Parlamentario mr. Juan E. Thijsen (MEP) : Mike Eman ta
lagando salubridad publico den situacion alarmante

Thursday, 04 May 2017 11:53
Comparti

Parlamentario mr. Juan E.Thijsen a tuma for di bishitanan di cas pa cas y entradanan masal di MEP den
pueblo cu un di e preocupacionan grandi den nos comunidad ta e situacion di nos salubridad publico
tanto den un perspectiva macro como micro. Mientras hopi ta ser papia y tur partido politico ta
menciona e parti preventivo e no ta ser concretisa den practica.

Ta ainda nos ta den e cirquito di biba sin controla, bai dokter te ora tin algo, warda pa haya cita cu
dokter, despues warda pa haya sita cu specialista, keda Aruba of bai afo, warda wak kiko AZV ta cubri,
keda sin medicamento no plaka y finalmente tende bo ta laat. Ta parse cu den AVP mes tin invidia riba
otro. Ex Ministro di Salubridad Publico Richard Visser a inverti hopi den prevencion manera projectonan
di actividad y projectonan di obesidad na scolnan. Sinembargo bow maneho di Minister Schwengle tur
esaki a bai perdi y ta remarcable cu Mike Eman ta scohe pa Alex Schwengle un biaha mas. Pa loque ta
hospital MEP tabata preparando pa realisa un otro hospital pariba di brug pero AVP a para esaki tambe.
Na lugar di esey AVP a scohe pa renoba e hospital actual compremetiendo nos pais na un debe di 1 biyon
sin cu e ta un inversion completo esta incluyendo inversion den equipo y personal. Es mas e renovacion
di hospital ta contene menos di loque Corsow a inverti den un hospital nobo y di Corsow a costa hopi
menos. Esaki pues ta problemanan macro falta di prevencion , tardanza den servicio, falta servicio
adecuado, inversion malo etc.

Pa loque ta problemanan micro gobierno ta hungando cu salud di nos hendenan. Personanan ilegal ta
drenta Aruba cu tur sorto di malesa y ta ser atendi riba sala hunto cu otro pashentnan. Malesanan grave
manera tuberculosis no ta haya su debido atencion. E hospital mes tur hende sa cu e ta contamina cu
bacterianan. Pio ainda hospital segun kehonan ricibi no ta percura pa proteha e personal debidamente.
Esaki pa miedo di haya hopi ao den hospital. Tambe tin hopi keho cu trahador local no ta haya chens pa
educa nan mes y no ta haya chens pa promove nan mes. Hopi trahador di afor ta worde parachuteer cu
cas, auto, comunicacion tur paga y tin biaha e trahador local tin cu sinjanan tambe. Tin un sistema di
uitzendkrachten for di Hulanda cu ta stroba e hubentud drenta e trabao den enfermeria y riba dje
opleidingnan a ser para. Parlamentario mr. Juan E.Thijsen ta kere cu atencion debido mester ser duna
na e kehonan aki y mester bin un maneho completamente nobo pa cu salubridad publico na Aruba.
Partido MEP sigur ta cla pa e reto aki.