Page 43 - ARUBA BANK

Actualmente tanto gobierno di Aruba y Hulanda ta den un bay bin pa loke ta e version
final di e protocol, cu mester keda firma pa por garantisa continuidad di e supervision
financiero di e colegio di supervision financiero. Unabez cu esey ta cla, ta concretisa
esaki den un ley nobo di LAFT. Esaki mester sosode prome cu fin di aña ainda, pa e
trabou di CAFT por continua. De hecho, esaki ta loke cu Wever ta referi na dje awor, cu
CAFT en realidad no tin e autoridad pa controla trabou valido pa 2019. Pero gobierno a
opta pa laga CAFT toch ‘controla’ e presupuesto, como gesto di bon boluntad. Algun
tempo atras, e portal aki a puntra e representante di Hulanda cu tabata na Aruba pa un
bishita, esta Raymond Knops con leu esaki ta. Knops a simplemente bisa cu ‘Hulanda ta
cla’ y cu ta wardando riba Aruba. Pero e portal aki ta informa cu tabatin varios ‘bay bin’
riba e asunto y e aspect di personal ta keda un ‘bottleneck’.

PARLAMENTO

A haci e pregunta e tempo ey tambe cu si Parlamento tin poder riba cambionan pa cu e
protocol aki, mirando e preocupacion di fraccion di MEP riba e tereno aki. E tempo ey,
Wever a splica e portal aki cu E intencion tabata pa unabez cu tin un palabracion entre
gobiernonan di Aruba y Hulanda riba e supervision financiero ‘nobo’, pa establece esaki
den un protocol. E pregunta ta, si unabez cu e protocol bay Parlamento pa convirtie den
un cambuio di e ley actual di CAft, esta LAft, si Parlamento tin espacio pa haci cambio di
e contenido si nan no ta di acuerdo cune. Prome minister di Aruba Evelyn Wever Croes a
confirma pa NoticiaCla e tempo ey cu Parlamento enberdad lo haya e espacio pa haci
cambionan si nan no ta di acuerdo.