Page 3 - UTILITIES 28 FEB, 2017

Luz di Caya pa Saliña a cuminsa wordo poni, brindando mas

trankilidad na habitantenan

Monday, 27 February 2017 19:44
Comparti

Ora cu ciudadanonan a haci peticion pa haya tereno na Saliña, nan no a pensa cu nan lo mester a biba pa
un temporada largo den scuridad.
Na e scuridad aki a yega un fin ora cu e peticion pa iluminacion di e bario a haya atencion di Prome
Minister Mike Eman y su Gabinete.
A toca suerte pa Pedro y Rita Tromp di Saliña 4-C cu e prome luz LED di e programa “Luz den Bario” a
keda instala dilanti di nan cas “Esaki ta un suerte grandi pa nos. Awo nos no mester cende e luz grandi
mas dilanti cas y nos ta bay baha nos consumo di coriente,” Pedro Tromp a expresa despues di e
ceremonia di cendemento di e prome punto di luz nobo den Saliña.
Pa Rita Tromp de Cuba, e iluminacion ta un alegria. “Ki ora nos yega cas anochi e area aki ta scur scur. E
ultimo luz ta basta leu di nos cas. Esaki ta yuda nos masha hopi pasobra nos ta cende luz di cas pa haya
mas claridad.” E ta un pensamento cu su casa Pedro ta comparti, ya cu e ta duna un extra seguridad na e
habitantenan.
Prome Minister Eman a papia basta largo cu e pareha, kende a expresa nan deseo tambe pa e caminda
den e bario di Saliña tambe haya un capa di asfalt. E molester ta grandi, segun sra. Rita Tromp De Cuba a
bisa. Principalmente door cu e trucknan di sceptic tank ta pasa hopi, e ta lanta masha stof y e casnan ta
haya hopi di e stof aki. Prome Minister Eman a priminti cu e lo informa su colega di infrastructura Benny
Sevinger y pidi'e pa pone e area aki tambe riba e lista di camindanan di tera cu mester wordo evalua pa
haya asfalt.
Prome Minister Eman a cende e luz durante un ceremonia cu presencia di habitantenan y a splica cu
cada pasa un palo lo pone luz LED. Esaki ta pa motibo cu e tipo di luznan aki ta hopi mas briyante y ta
ilumina un area mas grandi cu e luznan tradicional cu tin actualmente.
E programa di Luz den Bario ta un iniciativa di Prome Minister Mike Eman, mirando cu esaki ta un
preocupacion cu e ta scucha continuamente for di habitantenan for di momento cu el a cuminsa bishita e
barionan como Gobernante y e deseo pa brinda un miho calidad di bida na su pueblo. A cuminsa cu e
programa aki na 2012-2013 y a haya cooperacion di su coleganan Minister Mike de Meza y Benny
Sevinger, encarga cu ELMAR NV y Infrastructura respectivamente.

http://www.24ora.com/index.php?option=com_content&view=article&id=119152:luz-di-caya-pa-salina-
a-cuminsa-wordo-poni-brindando-mas-trankilidad-na-habitantenan&catid=1:local&Itemid=5