Page 66 - ATA
P. 66
Diaranson mainta e apertura oficial a tuma luga na Renaissance Convention Center, unda
Minister President Sra. Evelyn Wever-Croes a habri e conferencia, expresando su
gratitud na tur e participantenan cu ta haciendo Aruba nan prioridad pa bende den
exterior y asina atrae e bishitantenan pa disfruta di nos bunita destinacion. Minister di
Turismo Sr. Danguillaume Oduber a elabora riba e importancia di e industria di Turismo
pa Aruba, elaborando cu Aruba ta un isla hopi diversifica cu orientacion internacional,
pero uno cu ta trata di mantene y accentua mas su cultura propio, loke nos bishitantenan
ta encanta. Tambe a subraya e hecho cu e mercadonan Mericano y Canades ambos ta
sumamente importante pa pais Aruba.
BIAHERONAN INTERNACIONAL Y SU NIFICACION PA ARUBA
Durante su presentacion, CEO di Aruba Tourism Authority Ronella Tjin Asjoe-Croes a
ilustra entre otro riba turismo internacional. SKIFT cu ta un compania internacional bon
conoci den e industria di biahe cu ta haci analisis di aerolinea –hotel – turismo en general
– industria di crucero etc., den un rapport recien ‘Global Travel Economics 2019–2029’a
menciona cu ‘biahe internacional ta un di e industrianan cu ta mustra desaroyo mas
impresionante ultimo añanan, algo cu ta proyecta cu lo continua.’ Basa riba data historico
di e Organisacion Mundial di Turismo (WTO) tawatin 494 miyon salidanan nobo di
biaheronan internacional over di e ultimo 10 añanan. Segun pronosticonan di SKIFT,
esaki lo bira 507 miyon salidanan di biaheronan nobo pa e siguiente 10 añanan!
