Page 70 - KPA 20 MAY 2017

Prome Minister a cuminsa haci e caminatanan aki mas di 7 aña pasa. Meta di Accion di
Bario ta pa conoce e preocupacionnan di cada bario, pero tambe e sugerencianan cu nan
por tin pa mehoracion di nan bario y tambe Aruba en general.

Prome Minister ta haya e contacto cu pueblo aki un parti esencial di e maneho di su
Gabinetenan. Algun aña atras den e bario a informa Prome Minister cu e bario mester di
luz principalmente. Prome Minster ta contento di informa cu awe t’asina leu cu luz ta
yega partinan di e bario cu no tin luz.

E instancianan di Gobierno ta probecha accion di bario pa nan tambe por tin un contacto
cu barionan y por haci nan inspeccionnan, den e caso aki GKMB ta probecha di haci
control pa insectonan indesea, pero particularmente, criadero di sangura.

Serlimar di su banda ta cla pa yuda bisiñanan cu sushi cu normalmente no por deshaci di
nan. Hopi bes, hendenan grandi ta aprecia esaki masha mes, ya cu hopi bes ta dificil pa
nan por move of carga sushi pisa of grandi.

City Inspector ta haci su sondeo den e bario pa sa e preocupacionnan cu nan por traha
riba nan na beneficio di e bario henter.

Den combersacion cu e habitantenan, nan a expresa alegria p’e promesa cumpli di e
peticion cu nan a pa instalacion di luz di caya. Mescos cu e otro barionan, e otro deseo di
importante di habitantenan ta pa camindanan asfalta.

“Esaki ta un promesa tambe cu nos ta haci”, Prome Minister Eman a bisa e habitantenan.
E ta den combersacion cu Minister di Infrastructura caba riba e barionan unda cu ta hopi
urgente pa haya asfalt, unda cu no tin ningun caminda asfalta.

E bishita di e mandatario den e bario den algun caso a wordo spera y otronan el a cay di
sorpresa, unda ciudadanonan tin bes no por kere cu di berdad Prome Minister Eman ta di
bishita serca nan, manera t’e caso di Julius Hart, kende tin 40 aña bibando den e mesun
becindario, mescos cu diferente otro miembro di su famia.

“Awe ta Minister President mes a bishita’mi. Awe ta prome biaha den historia cu algo
asina a sosode aki banda. Practicamente tur esnan di pasado, a yega di pasa pero pa busca
voto y bay. Nan a priminti, pero nada a bira realidad. Mi tin 40 aña sperando un poco di
asfalt pero nada. Awo mi ta convenci cu awor si mi ta bay haya asfalt.”