Page 3 - Djaluna 5 november 2018.pdf

Djaluna 5 Novèmber 2018 3
Igualdat

Kòrsou ta
kuminsá

deliberashon
ku partidonan

WILLEMSTAD.-
Organisashon Igualdat Kòrsou
(IK) e siman aki ta kuminsá
ku su ronda di diálogo ku
partidonan polítiko ku ta
representá den parlamento di
Kòrsou, tokante proyekto di
Lei pa Igualdat Matrimonial.
Asina Mario Kleinmoedig di IK
a bisa ayera na EXTRA. Segun
Kleinmoedig te ainda 5 partido
polítiko a reakshoná riba
invitashon di e organisashon,
ku tres partidonan a traha un
fecha pa deliberá. Parlamento
aktual ta konosé 7 diferente
partido. Kleinmoedig no ke
bisa kua ta e partidonan ku
a reakshoná te ainda riba e
invitashon di IK. Manera ta
konosé dia 27 di sèptèmber,
durante Curaçao Pride, a
entregá simbólikamente na
parlamentario Giselle Mc
William proyekto di Lei pa
Igualdat Matrimonial. Dia
4 òktober IK a manda un
komunikado di prensa ku
a drenta ‘un fase di ronda
di diálogo ku direktiva di
partidonan polítiko paden i
pafó di parlamento.’ Igualdat
Kòrsou ta haña e ronda
di informashon nesesario
‘pasobra tin un tradishon
di polítika na Kòrsou pa
diskutí i tuma posishon riba
temanan ku tin di aber ku e
komunidat LGBT, sin papia
ku e representantenan di e
komunidat: Ni pa ta mihó
informá tokante e parti ei
di nos poblashon, ni pa
tende o tene kuenta ku nan
mes opinionnan.’ Ku un
aliansa nobo di tur grupo i
organisashon LGBT, Igualdat
Kòrsou ke trese un kambio den
esei, establesiendo liñanan di
komunikashon ku partidonan
i otro organisashonnan
den komunidat. Segun
Kleinmoedig IK ke deliberá
ku e partidonan pa duna
informashon. ‘Nos ta habrí pa
kambia sierto palabranan den
e konsepto di lei, si ku esaki
partidonan ta duna nan sosten
na e konsepto. Nos intenshon
ta pa papia habrí ku tur e
partidonan.’ Den esaki e ta
lamentá ku ta parse ku partido
MFK a tuma posishon tokante
e konsepto promé ku nan a
deliberá ku e organisashon.
‘Nos no ta enemigu di niun
partido. Parlamentarionan ta
representá pueblo i nos ke pa
nan representá komunidat di
LGBT tambe.’ E ta spera ku tur
e parlamentarionan ta habrí
pa deliberá ku IK.