Page 6 - AHATA

Qredits ta un desaroyo hopi positivo y

nan ta cla pa brinda sosten

BY: LOOP NEWS
08:41, April 8, 2017

38 VIEWS

ATIA ta kere cu nan por tin un papel activo:

Director di Aruba Trade & Industry Association (ATIA), Michelle de Groot tabata presente na
lansamento di Qredits na Aruba. E ocasion a reuni representantenan di sector publico y priva pa
celebra entrada di e programa di micro creditonan cu ta bay facilita e establecimento di negoshinan
nobo riba nos isla. De Groot ta wak e entrada di Qredits como un desaroyo hopi positivo y a duna di
conoce cu ATIA “tin pensa di acerca Qredits pa ofrece servicio di coaching pa haci di e negoshinan
un exito.”

De Groot a expresa cu na Aruba tin hopi idea bon eyfo, pero e falta di capital semper tabata e
obstaculo di mas grandi; empersarionan kier cuminsa algo, pero hopi biaha no ta yega na realisa pa
falta di capital. Banconan grandi ta pidi un inversion propio y esey ta haci e drempel hopi halto pa e
hendenan por cuminsa cu algo. Awo cu Qredits, empresarionan tin un oportunidad real di duna un
estimulo na nos economia.
ATIA ta kere cu nan por tin un papel activo den e tendencia aki y ta dispuesto pa aporta di e miho
manera cu nan por y esey ta atrabes di e experiencia di nan miembronan, esta e comerciantenan ya
estableci. “Nos tin miembro di empresa chikito, mediano y grandi cu por guia e empresarionan aki
pa asina haci di e negoshi un exito,” asina de Groot a bisa. Qredits ta un organisacion Hulandes cu
a yega Aruba riba iniciativa y invitacion di Gabinete Mike Eman cu e proposito pa promove actividad
comercial y stimula e industria di conocemento y Aruba como hub comercial entre continentenan.