Page 3 - MIN VOS

Amazonanan di Aruba ta logra mas di 30 premio den
Spectrum International

Tuesday, 30 May 2017 13:52
Comparti

Ariba e prome dia di competencia cual tabata diaranson ya caba Aruba a bay cu varios premio den e Pre-
Spectrum cu ta lo siguiente. Den e categoria di Pleasure, e amazonanan Zoey Arends ta keda na prome
lugar y Natalia Mouawad na di segundo lugar. Den Performance Elizabeth Johnson ta keda na di prome
lugar.

Den e categoria di International Equitation, Elizabeth Johnson ta sali gana den e categoria di 10-15 anja,
y Zoey Arends ta sali gana den e categoria di 16-24 anja, caminda Natalia ta logra un segundo puesto.
Tambe riba e prome dia di competencia den Performance 3 year old Fillies, Melanie Wever ta competi su
ehemplar logrando un prome lugar, y despues den Campeonato di Performance Fillies & Mares, Melanie
Wever ta keda Campeon hunto cu su ehemplar Sinfonia de United. Ariba diabierna den e categoria di
Pleasure Jr. Youth, Natalia Mouwad ta sobresali cu un prome lugar, despues di a wordo compara cu dos
otro amazona, uno di cual ta Zoey Arends cu ta keda na di dos lugar. Den Performance Jr. Youth a
competi Melanie Wever y Elizabeth Johnson, caminda despues di compracion Melanie ta keda cu un
prome lugar y Elizabeth Johnson cu un di dos lugar. Remarkabel ta cu e categorianan di Pleasure y
Performance no ta existi na Aruba, pues e amazonanan mester adpata nan mes na e requisitonan di
Estados Unidos, cu ta ensera no solamento monta e cabay den e paso natural esta e paso corto di e cabay,
pero tambe monta e cabay den un paso alarga (Paso Largo), y despues demonstra nan dominio di hiba e
cabay na un paso relaha, esta canando e cabay. Pues e amazonana di Aruba ta demonstra cu nan tin e
habilidad y maneho pa adpata na cabaynan nobo y cumpli cu e reglanan di cada categoria y triunfa den
esakinan. E amazona Melanie Wever a competi tambe cu su cabay den categoria di Classic Fino Stallions
A/O (Amateur Owner), akinan e la logra un tercer lugar den locual tabata un bataya fuerte entre basta
participante. E la competi den e categoria aki cu su cabay Caucus de Colores.

Ariba diasabra e amazonanan a bolbe bek den ring, prome den e categoria di Youth Equitation, caminda
Melanie Wever ta keda na di prome lugar, Zoey Arends segundo lugar, Natalia Mouawad di 5 lugar y
Elizabeth Johnson di 6 lugar. Den International Equitation 7-24 anja Melanie Wever ta e unico
representante di Aruba y ta logra un segundo lugar. Den Classic Fino Jr. Youth Zoey Arends ta keda
prome lugar, Elizabeth Johnson segundo lugar, y Natalia Mouawad di 6 lugar entre 11 participante total
caminda e jueznan a hasi varios comparacion. Ariba e ultimo dia di Spectrum cual tabata diadomingo, e
amazonanan a cuminsa cu e Campeonato di Pleasure Fino. Akinan Natalia Mouawad gana segundo lugar
y Zoey Arends tercer lugar. Despues den e Campeonato di Youth Equitation a keda campeona Melanie
Wever, sigi pa subcampeona Zoey Arends y Natalia Mouawad tercer lugar. Den International Equitation
16- 24 anja a keda Melanie Wever primer lugar, Natalia Mouawad segundo lugar y Zoey Arends tercer
lugar. Tambe Melanie Wever a competi su cabay Caucus de Colores den e Classic Fino Colts/Stallions
Championship caminda a keda na di tercer lugar. Despues di basta dia di competencia, sin ningun duda a
keda demonstra cu e amazonanan di Aruba ta di altisimo calidad, caminda a domina den tur categoria cu
a competi aden. Un palabra di pabien ta bay pa un y tur, como tambe e entrenadornan di e amazonanan.