Page 25 - WEB

WEB ARUBA y DELL ta inicia proyecto ‘ICT Infrastructure &
Data Center’

Tuesday, 23 May 2017 19:15
Comparti

Despues di varios luna den negociacion, WEB Aruba y DELL a firma acuerdo pa inicia oficialmente e
proyecto “ICT Infrastructure & Data Center”. E proyecto aki tambe ta forma parti di WEB su strategia
yama, ‘Aruba Renewable Energy Strategy’ (ARES) y ta encera un solo red nobo y centralisa cual lo
interconecta tur sistema di control di e planta y tambe aplicacionnan administrativo.

E acuerdo entre WEB Aruba y DELL ta consisti di un parti tecnico, un parti comercial y un parti legal
cualnan ta formalisa ehecucion di e proyecto den e proximo 8 pa 9 lunanan, pa ekipa WEB entre otro cu
un sistema di ‘network’ y ‘server’. Na mes momento tur ekipo y ‘software’ lo bay den un asina yama,
“Modular Data Center” y tambe WEB lo conta cu un centralisacion completo di maneho di nan red. Esaki
ta un otro inversion grandi caminda WEB lo inverti casi 9 miyon florin pa garantisa cu e compania ta
capacita y prepara pa futuro retonan riba tereno di ICT, mediante solucionnan di tecnologia avansa
manera ‘hyperconversion’, ‘virtual desktop infrastructure’ y plataformanan di virtualisacion. Segun
director di WEB Aruba, Luis Oduber, via e sistemanan di virtualisacion aki, e departamento di ICT di
WEB lo por duna un servicio mas efectivo na henter e organisacion y finalmente optimalisa su producto y
servicio na comunidad. “Nos empleadonan lo tin mas herment cu lo yuda cada un eherce nan trabou
eficientemente. Nan lo por uza tur e ekiponan aki, na cualke momento, pa haya acceso na tur aplicacion
na un manera confiabel, directo y rapido” asina Sr. Oduber a splica durante e ceremonia di firmamento.
Esaki no ta prome biaha cu WEB ta colabora cu DELL. E departamento di ICT ya caba a haci varios
cambio den su operacionnan desde aña 2014.

E tempo ey a busca companianan cu por a provee solucionnan segun e strategia y ‘roadmap’ di ICT, unda
DELL World Trade L.P. a resulta di ta e compania ideal cu ta comparti e vision y strategia di WEB pa
realisa e trabounan aki. E proyecto ‘ICT Infrastructure & Data Center’ ta di magnitud grandi, segun
director Oduber; No solamente DELL lo duna solucionnan cu tecnologia avansa, mas facil di opera y
mantene, pero tambe tur otro proyecto di WEB su ‘Aruba Renewable Energy Strategy’ (ARES) lo
beneficia di e proyecto aki, particularmente e proyecto di ‘Intelligent Generation Management System’
(IGMS). A duna prioridad halto na e proyecto aki y a haci e cambionan necesario pa introduci
tecnologianan nobo sostenibel, confiabel y pagabel. WEB ta gradici e ekipo di ICT cu a traha riba tur
faceta di e proyecto aki, mientras cu a sigui mantene e servicio na henter organisacion di WEB. Tambe ta
gradici e ekipo di process control, kende lo ta usuario di e tecnologia avansa aki y e departamento di
proyecto di WEB cu a facilita henter e proceso di negociacion.